केन्या ले लहुटे युवक म मिलिस कोरोना के लक्षण, स्वास्थ्य विभाग ह कहिन- सैंपल जांच बर भेजे गिस

जय जोहार रायपुर। छत्तीसगढ़ म घलो कोरोना वायरस के एक संदिग्ध मिले हे। जेमा वायरस के लक्षण पाए जाए म स्वास्थ्य विभाग ह ओखर सैंपल लेके जांच बर लैब भेज दे हे।

मामला म स्वास्थ्य मंत्री टीएस सिंहदेव ह मीडिया ले बातचीत म कहिन कि केन्या अऊ दुबई ले होत हुए एक मरीज रायपुर पहुंचे हे, जेमा कोरोना के लक्षण दिखाई देत हे। ओखर सैंपल जांच बर नागपुर भेजे गे हे। मंत्री ह कहिन कि छत्तीसगढ़ म कोरोना ल लेके सावधानी बरती जात हे।

ऊहचे स्वास्थ्य सचिव निहारिका बारीक अऊ संचालक स्वास्थ्य सेवाएं नीरज बंसोड़ ह कहिन कि भिलाई के एक युवक केन्या ले दुबई होके वापस लहुटे हे। एयरपोर्ट म ओखर सैंपल लेके जांच बर नागपुर भेजे गे हे। अभी ओखर रिपोर्ट प्राप्त नई होए हे। ओला ओखर घर म आइसोलेशन म रखे गे हे।