विपक्ष ह स्वास्थ्य मंत्री ल सिम्स आगजनी मामला म घेरिन

रायपुर: छत्तीसगढ़ विधानसभा म बजट सत्र के तीसरा दिन विपक्ष ह स्वास्थ्य मंत्री टीएस सिंहदेव ल सिम्स आगजनी मामला म घेरिन। जेसीसीजे विधायक धर्मजीत सिंह ह स्वास्थ्य मंत्री टीएस सिंहदेव ले सिम्स आगजनी मामला म इस्तीफा के मांग करिस।

इस्तीफा के मांग म स्वास्थ्य मंत्री सिंहदेव ह कहिन, मैं ह हर जुम्मेदारी ल निभा हूं। भगइया नो हन। बता दन के सिम्स म आगजनी के कारन 5 लइका के मउत हो गे रहिस हे। ए मामला म धर्मजीत सिंह ह स्वास्थ्य मंत्री उपर जमके निसाना साधिस। उमन कहिन, ‘सिंहदेव या त बेवस्था सुधारय या अपन इस्तीफ़ा देवय’।

सिम्स के भवन के होही निरमान

एती सिंहदेव ह पलटवार करत हुए कहिन, ‘मैं ह नइ भागव। एखर सेती इस्तीफा के मांग नइ करव। हमन हर तरह के जवाबदारी निभाबो। सिम्स के नवां कैम्पस बर प्लान बनाय जात हे। रासी उपलब्ध होय के बाद भवन के निरमान करे जाही। एसईसीएल ले नवां उपकरन घलो जल्द ही उपलब्ध हो जाही।

धरमलाल कौशिक ह लगाइस आरोप

उहें नेता प्रतिपक्ष धरमलाल कौशिक ह ए घटना म मृत लइका मन के परिजन मन बर मुआवजा के मांग करिन। उमन सरकार उपर आरोप लगात हुए कहिन, ‘अग्निशमन यंत्र खरीदे के बावजूद ओला सुरू नइ करे गे हे। का ए बेवस्था नइए?’

कौशिक के आरोप मन ल खारिज करत हुए सिंहदेव ह कहिन, ‘ए घटना कोनो गड़बड़ी के चलत नइ होइस हे। एखर सेती ए संभव नइए। सिम्स म आग शार्ट सर्किट ले लगिस हे। एमा अग्निशमन यंत्र के कोनो कनेक्शन नइए।’