सिम्स म डॉक्टर समेत 38 स्वास्थ्यकर्मी मन ह होइस क्वारेंटाइन

जय जोहार…. कोरोना वायरस संक्रमण ले संदिग्ध प्रवासी श्रमिक के मौत के बाद डॉक्टर समेत 38 स्वास्थ्य कर्मी मन ह क्वारेंटाइन हो गे हे। ए सब्बो ह मरीज के इलाज ले जुड़े रहिस। ए जानकारी ल बिलासपुर के सिम्स मीडिया प्रभारी डॉ. आरती पांडेय ह दे हे। वो हा बताइस कि 15 वार्ड बॉय अऊ आया ल साईं अमृत म क्वारेंटाइन करे गे हे। डॉक्टर समेत शेष 23 नर्सिंग स्टाफ ल बस स्टैंड ले सेंट्रल पाइंट म क्वारेंटाइन करे गे हे।

गौरतलब हे कि 23 मई के बिलासपुर के सिम्स म एक कोरोना संदिग्ध के मौत हो गे रहिस। मृतक प्रवासी मजदूर ह पुणे ले लहुटे रहिस। ओला 14 दिन बर क्वारेंटाइन करे गे रहिस। ए बीच क्वारेंटाइन सेंटर म प्रवासी मजदूर के तबियत ह बिगड़ गिस। ओला सांस लेने म दिक्कत होय के शिकायत के बाद बिलासपुर के सिम्स म भर्ती करे गिस। जिहां इलाज के दौरान प्रवासी मजदूर के मौत हो गिस। जेखर बाद डॉक्टर समेत 38 स्वास्थ्य कर्मी मन ल क्वारेंटाइन करे गे हे।