रायपुर । कांग्रेस के राष्ट्रीय अध्यक्ष राहुल गांधी के छत्तीसगढ़ दउरा ल लेके एक के बाद एक नवा पेंच फंसत जात हे। अजीत जोगी ह पहिली ले ही मइदान म बाजी जीत के राहुल गांधी ल दूसर मइदान म सभा करे बर मजबूर कर दिस हे। अब सरगुजा जिला प्रसासन ह एक अउ नवा अड़चन खड़े कर दीस हे।
दरअसल म 17 मई राहुल गांधी छत्तीसगढ़ दउरा म आवइया हे, लेकिन सरगुजा जिला प्रशासन ह इही दिन अंबिकापुर म सरपंच मन के मीटिंग बुलाइस हे, जेमा सबो सरपंच मन ल सामिल होना जरूरी बताये गेहे।
कांग्रेस ह राहुल गांधी के कार्यक्रम ल किसान आदिवासी सम्मेलन के नाम दे हे। लिहाजा कांग्रेस ल ये बात के चिंता हे, कि सरपंच मन के मीटिंग म चले जाय ले सभा म भीड़ जुटाए म परेसानी होवत हे। येती कांग्रेस ह दावा करत हे , कि राहुल के सभा मे कम ले कम 50 हजार लोगन सामिल होही।
नेता प्रतिपक्ष टीएस सिंहदेव अउ अमरजीत भगत ह मुख्य सचिव ल पत्र लिख के सरपंच मन के मीटिंग के तारीख बदले के मांग करे रिहिस हे। कांग्रेस के आरोप हे कि ये करस्तानी राहुल गांधी के दउरा ल प्रभावित करे बर जानबूझ के करे गिस हे।
