सरकार के एक पहल ह उंखर जिंदगी ल रोसन कर दीस

जशपुर। सरकार के एक नेक पहल ह गांव के बेरोजगार युवक मन के चेहरा म मुस्कान ला दीस हे। परिवार म खुसी ह दस्तक दीस हे। दरअसल गांव के बेरोजगार युवक मन ल मुख्यमंत्री कौसल विकास योजना के तहत प्रसिक्षित करे के बाद उमन ल गांव म ही नउकरी दे गिस।
गांव म रहइया युवक जे कल तक रोजगार के तलास म सहर दर सहर भटकत रिहिन हे। खेत मन म दिन रात मेहनत करत रिहिन हे ताकि,उमन ल दो वक्त के रोटी नसीब हो सकय। अइसे म सरकार के एक नेक पहल ह उंखर जिंदगी ल रोसन कर दीस। चेहरा म मुस्कान ला दीस अउ बदहाल आर्थिक स्थिति ल काफी हद तक सुधार दिस। दरअसल सौर उर्जा योजना म प्रसिक्षित युवक मन ल गांव म ही टेक्नीसियन अउ हेल्पर के नउकरी दे गेहे। ये युवक मन गांव म लगे सोलर पंप अउ सोलर लाइट ल सुधारे के काम करत हे।
जिला ल 13 क्लस्टर म बांटे गिस हे। हर क्लस्टर म टेक्निसियन अउ हेल्पर के नियुक्ति करे गेहे। योजना म प्रसिक्षण लेके नउकरी करिइया युवक मन के कहिना हे कि जिहां पहिली उमन ल रोजगार बर 30 किलोमीटर के सफर ल तय करके दूसर जगा जाए बर पड़त रिहिस हे। उहें खेती करके बड़े बमुस्किल ले परिवार के खरचा निकाल पात रहिन हे। लेकिन नउकरी मिले के बाद उंखर आर्थिक स्थिति म अब्बड़ सुधार होइस हे। आप मन ल बता दन कि योजना के तहत नियुक्त टेक्नीसियन ल 12 हजार अउ हेल्पर ल 7 हजार 300 रुपिया बतौर वेतन दे जात हे।
प्रसिक्षण के बाद नउकरी पा चुके गांव म रहइया रियाज अंजारी बताथे कि पहिली वो मजदूरी करत अपन परिवार के पेट पालत रहिस हे। लेकिन सरकार के पहल ले न सिरफ उमन ल प्रसिक्षण मिलिस बलकिन नउकरी घलो मिलिस। जेखर मदद ले अब अपन अउ अपन परिवार के सुग्घर ढंग ले ख्याल रख पात हन।