जय जोहार। छत्तीसगढ़ (chhattisgarh) म समर्थन मूल्य म धान खरीदी के महाभियान सरलग जारी हे। प्रदेस म समर्थन मूल्य म अब तक 102 लाख मीट्रिक टन धान खरीदी करे गेहे। धान खरीदी के एवज म 22.72 लाख ले जादा किसान मन ल लगभग 21,006 करोड़ रुपिया के भुगतान ल बैंक लिंकिंग व्यवस्था के तहत करे गेहे ।
ए बछर धान खरीदी के संगेसंग कस्टम मिलिंग बर सरलग धान के उठाव जारी हे । अब तक 102 लाख मीट्रिक टन धान म ले 87 लाख मीट्रिक टन धान के उठाव बर डीओ जारी करे गेहे, जेखर विरूद्ध मिलर्स डहार ले 78 लाख मीट्रिक टन धान के उठाव ल करे जा चुके हे । अधिकारी मन ह बताइन कि 18 जनवरी के 23 हजार ले जादा किसान मन ले 95 हजार मीट्रिक टन धान के खरीदी करे गेहे । सामान्य धान 2040 रुपिया प्रति क्विंटल अउ ग्रेड-ए धान 2060 रुपिया प्रति क्विंटल की दर ले खरीदे जात हे ।
गौरतलब हे कि ए बछर राज्य म 24.96 लाख किसान मन के पंजीयन होए हे, जेमा ले लगभग 2.30 लाख नवा किसान सामिल हे । राज्य म धान खरीदी बर 2617 उपार्जन केन्द्र बनाए गेहे ।
Other Articles
