chhattisgarh : 48 लाख 20 हजार हेक्टेयर म होही खरीफ फसल के बुआई, मक्का के रकबा बाढ़ही एक लाख हेक्टेयर
जय जोहार । (chhattisgarh) कृषि विभाग डहार ले अवइया खरीफ सीजन म फसल के बुआई ल लेके लक्ष्य के निर्धारण कर दे गेहे। खरीफ सीजन 2022 म कुल 48 लाख 20 हजार हेक्टेयर म आने आने प्रकार के फसल के बुआई होही, जेन बीते खरीफ सीजन 2021 के तुलना म लगभग 55 हजार हेक्टेयर जादा हे ।
(chhattisgarh) खरीफ सीजन 2022 के बुआई लक्ष्य निर्धारण म सबले उल्लेखनीय बात ये हे कि धान के रकबा म बीते खरीफ सीजन के तुलना म 5 लाख 35 हजार हेक्टेयर के कमी कर दे गेहे , जबकि मक्का के रकबा म लगभग एक लाख हेक्टेयर अउ कोदो, कुटकी अउ रागी के रकबा म लगभग 66 हजार हेक्टेयर के बढ़ोत्तरी करे गेहे । धान के रकबा ल घटाय के संग कृषि विभाग ह दलहन-तिलहन अउ आन फसल के बुआई रकबा म बीते बछर के तुलना म लगभग पौने तीन लाख हेक्टेयर के बढ़ोत्तरी के लक्ष्य ल रखे हे ।
कृषि विभाग ले प्राप्त जानकारी के अनुसार खरीफ सीजन 2021 म राज्य म 47 हजार 65 हजार 190 हेक्टेयर म खरीफ फसल के बुआई होय रिहीस । खरीफ सीजन 2022 म ए लक्ष्य ल लगभग 55 हजार हेक्टेयर बढ़ाके 48 लाख 20 हजार हेक्टेयर कर दे गेहे । बीते खरीफ सीजन म राज्य म 38 लाख 99 हजार 340 हेक्टेयर म धान के बोनी होय रिहीस, खरीफ सीजन 2022 म ए लक्ष्य ल घटाके 33 लाख 64 हजार 500 हेक्टेयर कर दे गेहे ।
