हर जिला म फूड पार्क के संग वनौषधि उपर आधारित उद्योग लगाय उपर जोर
पंडित रविशंकर शुक्ल विश्वविद्यालय के 24वां दीक्षांत समारोह ल संबोधित करिन राज्यपाल
रायपुर. कुलाधिपति अऊ राज्यपाल श्रीमती आनंदीबेन पटेल ह उपाधि पवइया पढ़ईया लईका मन ले सामाजिक बदलाव बर कोनो एक संकल्प लेहे के आह्वान करिन। राज्यपाल आज स्थानीय पं. दीनदयाल उपाध्याय सभागृह म पं. रविशंकर शुक्ल विश्वविद्यालय के चौबीसवां दीक्षांत समारोह ल संबोधित करत रहिन।
अपन अध्यक्षीय उद्बोधन म राज्यपाल ह कहिन के सामाजिक बदलाव के ये एक संकल्प बाल विवाह ल रोकना, बालिका शिक्षा ल बढ़ावा देना आदि कुछ हो सकत हे। उमन कहिन के जीवन अइसे बनावव जऊन दूसर मन बर अनुकरणीय होवय। कहूं हम पूरा देश म अइसन कर पाबो त अवइया दस बछर म भारत फेर विश्व गुरू बन जाही।
मुख्यमंत्री श्री भूपेश बघेल ह समारोह ल संबोधित करत कहिन के आज महाशिवरात्रि हे ए शुभ अवसर म पढ़ईया लईका मन ल स्वर्ण पदक अऊ उपाधि देहे जात हे ओ मन ल मैं हार्दिक बधाई देवत हंव। हमर देश महात्मा गांधी के 150वां वर्षगाठ मनावत हे, अऊ ये अच्छा संयोग हे के गांधी जी के नाती गोपाल कृष्ण गांधी ए कार्यक्रम के मुख्य अतिथि हे।
उमन कहिन के महात्मा गांधी के मानना रहिस के भारत गांव म बसथे अऊ ओ मन गांव मन ल स्वावलंबी बनाना चाहत रहिन। छत्तीसगढ़ सरकार महत्मा गांधी के आदर्श अऊ सपना मन के जइसे काम करत हे अऊ उही रस्ता म चलत गांव के विकास बर नरवा, गरूवा, घुरूवा अऊ बारी ल आधार बनाके योजना मन के क्रियान्वयन करे जात हे।
उमन कहिन के विश्वविद्यालय ले पास होए के बाद युवा मन के आघू सबले पहिली चुनौती रोजगार के होथे। राज्य सरकार ह एला ध्यान म रखत निर्णय ले हे के नवा रायपुर म सॉफ्टवेयर पार्क बनाए जाही। अइसनहे हर जिला म फूड पार्क के स्थापना करबोन संगेच प्रदेश म वनौषधि उपर आधारित उद्योग लगाए जाही। एखर से युवा मन ल रोजगार मिलही अऊ व्यवसाय घलोक फलही-फूलही।
Other Articles
