बैगा बहुल गांव म महिला मन ल आगू बढ़ाय बर विशेष अभियान
स्व-सहायता समूह ले जुड़के आत्मनिर्भर बनत हें महिलाएं
रायपुर. खैरागढ़-छुईखदान-गंडई जिला के कलेक्टर इंद्रजीत सिंह चंद्रवाल के निर्देश म पिछू दिन छुईखदान विकासखंड के बैगा बहुल गांव सरई पतेरा अउ लालपुर म महिला मन ल सशक्त बनाय बर विशेष अभियान चलाय गिस। ए अभियान के मुख्य उद्देश्य बैगा जनजाति के महिला मन ल स्व-सहायता समूह ले जोड़के ओमन ल आर्थिक रूप ले मजबूत अउ आत्मनिर्भर बनाना हावय।
ए कार्यक्रम म पद्मश्री फुलबासन यादव के मार्गदर्शन म महिला मन ल स्व-सहायता समूह के महत्व अउ ओकर ले होय वाला फायदा के बारे म विस्तार ले जानकारी दीस। ओमन ल बताय गिस कि समूह ले जुड़के ओमन अपन कमाई ल बढ़ा सकत हें, संग म समाज म घलो ओमन के मान-सम्मान बाढ़ी। ए बखत महिला मन ल समूह के काम-काज म बढ़-चढ़के हिस्सा लेय बर प्रेरित करे गिस।
ए अभियान म लगभग 150 महिला मन ह भारी उत्साह के संग भाग लिन, जेमा ले कतको झन ह स्व-सहायता समूह म जुड़े के ईच्छा जताइन। एकर बर सदस्य के सूची बनाके समूह बनाय के काम ल आगू बढ़ाय के कोसिस सुरु कर दे गे हे।
ए कार्यक्रम म जिला पंचायत अउ राष्ट्रीय ग्रामीण आजीविका मिशन (NRLM) के अधिकारी-कर्मचारी, डीपीएम, बीपीएम, स्वास्थ्य विभाग के प्रतिनिधि अउ आंगनवाड़ी कार्यकर्ता घलो उपस्थित रहिन।
