कांग्रेस व्यापार प्रकोष्ठ ह करिस बजट के स्वागत, कहिन गढ़बो नवा छत्तीसगढ़ ल समर्पित हे ये बजट

 जय जोहार रायपुर…. छत्तीसगढ़ प्रदेश कांग्रेस कमेटी प्रदेश व्यापार प्रकोष्ठ के अध्यक्ष राजेंद्र जग्गी ह कहिन कि ये जेन बजट हे, अन्नदाता ल समर्पित हे। ये बजट म हर वर्ग के ध्यान रखे गे हे। एमा 5100 करोड़ रूपिया के राशि राजीव गांधी किसान न्याय योजना के अंतर्गत किसान मन के बचे राशि ल दे बर के प्रावधान करे गे हे। फूड पार्क के तरफ ले रोजगार योजना ल बहुत अच्छा प्रतिसाद मिलही। व्यापारी मन के ज्वेलरी पार्क बर एक करोड़ रूपिया के बजट घलो रखे गे हे।

संगेसंग आवासी योजना के अंतर्गत बिल्डर मन के सिंगल विंडो प्रणाली ल स्वीकृति दे गे हे। ये व्यापार जगत ल ऊंचाई म पहुंचाए बर कारगर साबित होही। स्वास्थ्य, खेल अऊ शिक्षा बर ये प्रावधान ले छत्तीसगढ़ के युवा मन ल लाभ होही।

प्रदेश कांग्रेस व्यापार प्रकोष्ठ के अध्यक्ष राजेंद्र जग्गी ह कहिन कि छत्तीसगढ़ के व्यापार जगत ह ये बजट के स्वागत करत हे। संगेसंग एमा कोनो नवा कर नई लगाए गे हे।