पश्चिम बंगाल के प्रवासी मजदूर मन ल प्रदेश कांग्रेस कमेटी ह बस म करिन घर रवाना
जय जोहार…. छत्तीसगढ़ म फंसे पश्चिम बंगाल के मजदूर मन ल बस के जरिये घर वापस भेजे गे हे। ए मजदूर मन ल भेजे के व्यवस्था ल प्रदेश कांग्रेस कमेटी के तरफ ले करे गे हे। कुल तीन बस म 150 मजदूर मन के रवानगी होय हे। इही बस ले पश्चिम बंगाल ले छत्तीसगढ़ के मजदूर मन ल वापस लाय जाही।
कांग्रेस भवन, गांधी चौक ले मजदूर मन ले भरे बस ल प्रदेश कांग्रेस के पूर्व महामंत्री गिरीश देवांगन ह हरी झंडी दिखा के रवाना करिन। वो हा बताइस कि भारत म जब ले कोरोना वायरस के प्रकोप ह फैले हे, तब ले छत्तीसगढ़ म फंसे प्रवासी मजदूर मन के कांग्रेस पार्टी ह पिछिले दू महिना ले देखभाल ल करत रहिस।
वो हा बताइस कि पार्टी के राष्ट्रीय महामंत्री पीएल पुनिया के निर्देश म मुख्यमंत्री भूपेश बघेल अऊ प्रदेश अध्यक्ष मोहन मरकाम के मंशा के अनुरूप ए मजदूर मन ल व्यवस्था कर ओखर गंतव्य तक पहुंचाना हे, एखर तहत पश्चिम बंगाल के मजदूर मन ल रवाना करे जावत हे।
