कांग्रेस वर्किंग कमेटी के बइठक म शामिल होइस सीएम, बोलिस- मजदूर मन के रेल खर्च ल वहन करही राज्य सरकार

जय जोहार….मुख्यमंत्री भूपेश बघेल ह आज कांग्रेस के राष्ट्रीय अध्यक्ष सोनिया गांधी के तरफ ले आयोजित कांग्रेस शासित राज्य के मुख्यमंत्री मन के बइठक म वीडियो कांफ्रेंस के माध्यम ले शामिल होइस। ए बइठक म मुख्यमंत्री बघेल ह छत्तीसगढ़ म कोरोना ले बचाव अऊ रोकथाम, लॉकडाउन के संबंध म आघू के रणनीति के जानकारी दिस। वो हा प्रदेश म जरूरतमंद के मदद के उपाये के जानकारी दिस अऊ कहिन कि राज्य सरकार ह श्रमिक मन ल राज्य वापसी म लगइया ट्रेन के सबो खर्च ल वहन करही। मुख्यमंत्री बघेल ह बताइस कि मनरेगा म प्रदेश म 20 लाख लोगन मन ल रोजगार मिले हे अऊ छत्तीसगढ़ वनोपज संग्रहण म पूरा देश म अव्वल हे।

मुख्यमंत्री बघेल ह बताइस कि छत्तीसगढ़ ले लगभग 1 लाख 24 हजार 21 श्रमिक ह 21 राज्य अऊ चार केंद्र शासित प्रदेश म लॉकडाउन के चलत फंसे हे। राज्य सरकार ह श्रमिक मन ल राज्य वापसी म लगइया ट्रे के सबो खर्च ल वहन करही। एखर बर राज्य सरकार के तरफ ले रेल मंत्रालय ले 28 ट्रेन चलाये के मांग करे हे।