chhattisgarh : 3 सितम्बर ले अस्तित्व म आही  प्रदेस के 30 वां जिला सारंगढ़-बिलाईगढ़,  मुख्यमंत्री ह करही  नवा  जिला के सुभारंभ

जय जोहार ।  (chhattisgarh) सीएम भूपेश बघेल ह 3 सितम्बर के सारंगढ़-बिलाईगढ़ जिला के सुभारम्भ करही।   मुख्यमंत्री ह 15 अगस्त 2021 के स्वतंत्रता दिवस के अवसर म  नवा  सारंगढ़-बिलाईगढ़ जिला  के गठन के घोसना करे रिहीन ।

सारंगढ़-बिलाईगढ़ के नवा जिला बन जाय ले सासन-प्रसासन के मनखे मन तक पहुंच अउ मजबूत होही, जेखर ले ए क्षेत्र म विकास काम ल तीव्र गति मिलही । जिला मुख्यालय सारंगढ़ रायगढ़ ले रायपुर मुख्य मार्ग सारंगढ़ राष्ट्रीय राज्य मार्ग क्रमांक 200 म स्थित हे । इहां रियासत कालीन बेरा ले हवाई पट्टी हैं । जिला मुख्यालय सारंगढ़ छत्तीसगढ़ गठन के पूर्व ले तहसील मुख्यालय अउ अनुविभागीय अधिकारी राजस्व मुख्यालय के रूप म हे ।

ज्ञात हो कि (chhattisgarh) बिलासपुर संभाग के अंतर्गत अवइया जिला रायगढ़ के उप खण्ड सारंगढ़, तहसील सारंगढ़, बरमकेला अउ रायपुर संभाग के अंतर्गत अवइया जिला बलौदाबाजार-भाटापारा के उप खण्ड-बिलाईगढ़ अउ तहसील बिलाईगढ़ ल समाविष्ट करत हुये नवा जिला सारंगढ़-बिलाईगढ़ के गठन करे गेहे ।

नवगठित जिला के सीमा उत्तर म रायगढ़ जिला, दक्षिण म महासमुंद जिला, पूर्व म उड़ीसा के बरगढ़ जिला, पश्चिम म बलौदा बाजार अउ उत्तर-पश्चिम म जांजगीर-चाम्पा जिला ले लगे हे । जेमा तीन ठीन तहसील सारंगढ़, बरमकेला, बिलाईगढ़, उप तहसील कोसीर अउ भटगांव सामिल होही ।