बालोद जिला म होइस रोका-छेका योजना ह सुरू

जय जोहार…. बालोद जिला में रोका-छेका अभियान के शुरूआत हो चुके हे। जिला प्रशासन अऊ कांग्रेस के नेता-जनप्रतिनिधि मन के तरफ ले अलग-अलग कार्यक्रम ले ए योजना ल सुरू करे गिस। ऊहचे नगर पालिका क्षेत्र के कांजी हाउस म घलो पूजा अऊ अर्चना कर योजना के शुरूआत करे गिस।

प्रदेश कांग्रेस कमेटी के उपाध्यक्ष बीरेश ठाकुर ह कहिन कि भूपेश बघेल सरकार ह जब ले सत्ता म आय हे, तब ले गांव गरीब किसान के हित म नवा-नवा निर्णय लेवत हे। ओखर तरफ ले नरवा, गरवा, घुरवा जइसे महत्वपूर्ण योजना ल सुरू करे गे हे। जेखर खाती गौठान बनाय गे हे। अब रोका-छेका के माध्यम ले किसान मन ल मदद करे के योजना ल सरकार ह बनाय हे। गौ माता के रक्षा घलो हो पाही।

नगर पालिका अध्यक्ष विकास चोपड़ा ह कहिन कि ए योजना के पहले दिन गौठान के साफ-सफाई करे गे हे। संगेसंग ओखर बर दाना अऊ पानी के व्यवस्था करे जावत हे। वो हा बताइस कि पहले दिन रद्दा म आवारा घूमइया 100 मवेशी ल पकड़ के कांजी हाउस म रखे गे हे। जिहां ओखर देखभाल करे जाही। ए योजना ले किसान मन ल राहत मिलही। आवारा पशु ह जेन फसल ल नुकसान पहुंचावत हे, ओखर ले घलो मदद मिल पाही।