चिकित्सालय महाविद्यालय डिमरापाल ….परिचारिका कर्मचारी कल्याण संघ के हड़ताल 11 ले

काली पट्‌टी लगाके 11 ले सुरू होही अउ  19 फरवरी ले अनिश्चितकालीन हड़ताल

जगदलपुर। छत्तीसगढ़ परिचारिका कर्मचारी कल्याण संघ ह स्वर्गीय बलिराम कश्यप स्मृति शासकीय महाविद्यालय चिकित्सालय डिमरापाल म एक बइठक करिन।  जेमा  स्टाफ के कमी ल लेके  संघ ह काली पट्टी लगाके बहिष्कार के बाद अनिश्चितकालीन हड़ताल करे के निरनय लिस हे।  एखर सूचना प्रशासन अउ पुलिस ल दे गेहे।

हड़ताल के संबंध म अध्यक्ष प्रार्थना राज दास ह  बताइस के,  मेडिकल कॉलेज म स्वीकृत पद मन म भर्ती नइ होए  के कारन लगातार स्टाफ के कमी बने हुए हे।  जेखर ले काम करइया  कर्मचारी मन ल मानसिक व शारीरिक रूप ले परेसानी मन के सामना करना पड़त हे। स्टाफ नर्स ल एक संघरा दू-दू वार्ड देखे संग ही वार्ड बॉय के काम घलो करना पड़त हे।

अइसे म स्टाफ बीमार होए के संग ही कार्य के अधिकता हो ले दू स्टाफ नर्स के 7 माह म ही गर्भपात हो गिस। जे काफी निंदनीय हवय।  स्टाफ नर्स मन के अलावा वार्ड बॉय के पद घलो  खाली पड़े हे। कुछु  समय  पहिली स्टाफ नर्स अउ वार्ड ब्वॉय के संविदा पद घलो निकाले गे रहिस हे। लेकिन बाद म ए भर्ती ला रद्द कर देगिस।

भर्ती नइ हो के कारन स्टाफ विरोध प्रदर्सन करइया हे।  11 ले 13 फरवरी तक काली पट्टी लगाए जाही। उहें 14 ले 18 फरवरी तक काम के बहिष्कार होही। एखर बाद घलोक मांग पूरा नइ होही , त 19 फरवरी ले अनिश्चितकालीन हड़ताल म चले जाही।