बजट ल लेके नेता प्रतिपक्ष के कड़ा प्रतिक्रिया, कहिन- दीया हे न तेल, केवल नाउम्मीदी के खेल
जय जोहार रायपुर…. प्रदेश विधानसभा म नेता प्रतिपक्ष धरमलाल कौशिक ह बजट म प्रतिक्रिया व्यक्त करत कहिन कि ये पूरा बजट म कहूं आम जन के चिंता नई करे गे हे। ये बजट ल लेके इही केहे जा सकत हे कि दीया हे न तेल हे केवल नाउम्मीदी के खेल हे। नेता प्रतिपक्ष ह कहिन कि कांग्रेस के सरकार अपन घोसना पत्र म करे गे वादा ल घलो पूरा करे म नाकाम हे, शराबबंदी ल लेके कुछु घलो नई करे गे हे। जेन वादा के संग कांग्रेस सत्ता म आए हे, ऊहीं वादा ले मुकरत हे। उद्योग बर कुछु खास नई हे। आधारभूत संरचना ल मजबूत करे बर के दिशा म कोनो काम नई होए हे।
नेता प्रतिपक्ष ह कहिन कि बजट म महिला सुरक्षा के कोनो चिंता नई करे गे हे। बजट पूरा तरह ले कोरी कल्पना म केंद्रित हे। विकास के सोच ले कोसों दूरिया हे। वो हा कहिन कि छत्तीसगढ़ म वादाखिलाफी के सबले बड़े बजट हे। कांग्रेस सरकार ह पूरा तरह ले असफल बजट पेश करे हे।
