खेल प्रतिभा के प्रदर्सन बर मिलिस एक अउ प्लेटफार्म

रायपुर । राजधानी के खिलाड़ी मन ये दिन के बेसब्री ले इंतजार करत रहिन हे, जे आज खत्म हो गिस हे। अब ये स्टेडियम के लोकार्पण के बाद ले इहां के खिलाडडी मन ल अपन खेल प्रतिभा के प्रदर्सन हर एक अउ प्लेटफार्म मिल गिस हे। मुख्यमंत्री डॉ.रमन सिंह ह राजधानीवासी मन ल एक अउ बड़े सौगात देवत हुए सुभाष स्टेडियम के लोकार्पण आज संझा करिन।
शुक्रवार संझा आयोजित लोकार्पण समारोह के दउरान खिलाड़ी, जनप्रतिनिधिगण समेत प्रशासनिक अधिकारी मवजूद रहिन हे। मुख्यमंत्री रमन सिंह के लोकार्पित ये सुभाष स्टेडियम म कई सुविधा मन इहां आवइया खिलाड़ी मन ल मिलेही। करीबन 14.42 करोड़ के लागत ले बने ये स्टेडियम म करीबन 168 खिलाड़ी मन के ठहरे के बढ़िया व्यवस्था करे गेहे।
स्टेडियम म करीब 1500 दर्शक के बइठे व्यवस्था हे। येकर संग इहां 200 कार अउ 400 बाइक पार्किग के व्यवस्था करे गेहे। एक लाख वर्गफीट म बने ये सुभाष स्टेडियम म कई सुविधाएं उपलब्ध कराय गेहे। ये दउरान मुख्यमंत्री के आघू खिलाड़ी मन ह अपन खेल प्रतिभा के प्रदर्शन करिन।