करकाभाठ शक्कर कारखाना किसान मन बर बन गे हे परेसानी के सबब

बालोद. जिला के करकाभाठ के दंतेश्वरी मैय्या सहकारी शक्कर कारखाना म ये बेर पेराई सीजन के पहिली ही लाखों रुपिया खर्च कर मशीन मन के मेंटेनेंस कराय गे हे. एखर बाद भी आए दिन मशीन मन म खराबी आवत हवय. जेखर ले पेराई कार्य प्रभावित होवत हे. संगे-संग गन्ना लेके इहां पहुंचे किसान मन ल घलो परेसानी मन के सामना करना पड़त हवय.  गन्ना ले  भरे सइकड़ों ट्रैक्टर पाछू 4-5 दिन मन ल कतार म खड़े हे.

मिले जानकारी  म ए पेराई सीजन म किसान मन के भुगतान करीब 14 करोड़ रुपिया बकाया हे. डेढ़ माह पेराई सीजन हो गे हे, लेकिन भुगतान मात्र डेढ़ करोड़ के ही करे गे हे.गन्ना किसान मन ल आर्थिक लाभ देवइया जिला के करकाभाठ शक्कर कारखाना ए बेर किसान मन बर परेसानी के कारन बन गे हे.

आए दिन मशीन मन म  प्रॉब्लम आए के कारन पेराई कार्य प्रभावित होवत हे. बता देवन के किसान मन के खेत म गन्ना के कटाई हो चुके हे. अइसे म गन्ना लेके इहां आवइया किसान मन के  सिलसिला बने हवय. गन्ना खाली नइ होए ले सइकड़ों ट्रैक्टर गन्ना जाम हो गे हे.

एखर  सेती किसान मन ल  4-5 दिन के ट्रैक्टर भाड़ा देना पड़त हवय.दूसर ओर कारखाना म  ए बात के आरोप लगत हवय.  के जे रोस्टर बने हुए हे, ओखर अनुरूप इहां काम नई करे  जात हे.  प्रभावसाली लोग मन ल तत्काल टोकन दे देय जात ह.  अउ पहिली ले टोकन बर खड़े  किसान कतार म ही लगे हुए हे. कारखाना के जुम्मेदार अधिकारी घलो ए बात ल स्वीकारत हे के मशीन मन म खराबी आए रहिस हे, जेला फिलहाल ठीक करा देय गे हे.

उहें देवास ले संपर्क करे गे हे, ताकि मसीन मन ल पूरी तरह ठीक करे जा सकय. उहें कारखाना म अनियमितता के सिकायत उपर कलेक्टर ह कार्रवाई क बात कहे हे.बता देवन के  बीते 5 जनवरी ल जारी पेराई कार्य ले अब तक 53 हजार मीट्रिक टन गन्ना के पेराई हो चुके हे. एखर ले  47 हजार क्विटंल शक्कर के उत्पादन होइस हे. अभु पेराई बर गन्ना के  आवक लगातार बने हुए हे, लेकिन इहां व्याप्त अनियमितता के चलत किसान बेहद परेसान हे.