आज ले बढ़ही पारा, मौसम विभाग ह जारी करिन अलर्ट

जय जोहार…. छत्तीसगढ़ म गर्मी ह अपन असर दिखावत हे। प्रदेश म शुक्रवार के कहीं तापमान 40 त कहीं 42 डिग्री सेल्सियस ले जियादा रहिस। ऊहचे रायपुर म आज तापमान ह 42 के पार हो सकथे। बिहनिया ले ही तेज गर्मी अऊ गर्म हवा चलत हे।

मौसम विभाग ह अवइया एक सप्ताह तक भीषण गर्मी, तेज धूप के संग 25 मई ले लू  के दौर घलो जारी रहे के पूर्वानुमान जताय हे। ए दौरान अधिकतम तापमान ह 45-46 डिग्री तक जाय के पूर्वानुमान हे। मौसम विभाग के मुताबिक सनिच्चर अऊ इतवार के आंशिक रूप ले तेज गर्मी रही। कहीं-कहीं मौसम परिवर्तन ले बूंदाबांदी घलो हो सकथे। लेकिन गर्मी ले राहत मिले के संभावना नई हे। ये पश्चिमी विक्षोभ ह कमजोर हे। एखर सेति सक्रिय होय ले लोगन मन ल कोनो खास राहत नई मिलही।