दक्षिण के सुपर स्टार रजनीकांत हा मोदी-शाह ला कृष्ण-अर्जुन के जोड़ी बताईन

चेन्नई। तमिल सुपरस्टार रजनीकांत हा जम्मू-कश्मीर ले अनुच्छेद 370 हटाय जाय के केंद्र सरकार के फैसला के समर्थन करे हें। रजनीकांत हा रविवार के एकर बर प्रधानमंत्री नरेंद्र मोदी अउ गृहमंत्री अमित शाह ला बधाई घलो दीन। ओमन मोदी-शाह ला कृष्ण-अर्जुन के जोड़ी घलो किहिन।

रजनीकांत हा कश्मीर म सरकार के फैसला ला मिशन कश्मीर किहिन। ओमन देश के उपराष्ट्रपति वेंकैया नायडू के किताब के विमोचन कार्यक्रम म बोलत रिहिन। ओमन संसद म दिए गे अमित शाह के भाषण के भी तारीफ करिन अउ किहिन कि अब लोगन मन जानहीं कि शाह कोन ए।

एकर पहिली केन्द्रीय गृहमंत्री अमित शाह हा कार्यक्रम के दौरान किहिन कि अनुच्छेद 370 निष्प्रभावी करे के फैसला ले जम्मू-कश्मीर म आतंक के अंत होही। राज्य विकास के रस्ता म आगू बढ़ही। शाह हा किहिन कि ओमन ला भरोसा हे कि जम्मू कश्मीर ले विशेष दर्जा हटाना चाही, काबर कि एकर ले देश ला कोई फायदा नई रिहिस।