बेरोजगारी भत्ता ले मिलत हे सहारा, कौसल विकास ले नौकरी, योजना के हितग्राही मन ले रू-ब-रू होईन मुख्यमंत्री
मोर परिवार के आर्थिक दसा ठीक नई रिहिस, बेरोजगारी भत्ता मिले ले मोला सहारा मिलिस, हमन कभू नई सोचे रेहेन हमन ल अढ़ई हजार रुपिया बेरोजगारी भत्ता मिलही। एखर ले हमर माता-पिता के आर्थिक बोझ ह कम होए हे। अब महुं पढ़ई-लिखई कर सकत हों। ए जम्मो गोठ-बात बेरोजगारी भत्ता पवईया वो युवा मन के हे जेन ल सरकार ह बेरोजगारी भत्ता देवत हे। ए युवा मन ल बेरोजगारी भत्ता के संगे-संग अलग-अलग जिनिस म कौशल प्रशिक्षण घलो दे जात हे, जेखर ले ओमन खुद ले अपन उद्यम शुरू करे के संग नौकरी घलो पा सकत हे।
मुख्यमंत्री भूपेश बघेल आज अपन निवास कार्यालय म बेरोजगारी भत्ता योजना अऊ प्रधानमंत्री आवास योजना-ग्रामीण के हितग्राही मन ले ऑनलाईन चरचा करिन। ए कार्यक्रम ले वीडियो कॉन्फ्रेंस के माध्यम ले अलग-अलग जिला के जनप्रतिनिधि अऊ हितग्राही मन ले रू-ब-रू होईन।
तोकापाल के तुलसी ल मिलिस सिक्युरिटी गार्ड के नौकरी
वर्चुअली जुड़े बस्तर जिला के तोकापाल विकासखण्ड के ग्राम करंजी के तुलसी राम कश्यप ह अपन विचार साझा करत मुख्यमंत्री ले कहिन कि लाइवलीहुड कॉलेज म सिक्युरिटी गार्ड के ट्रेनिंग ओला मिले रिहिस अऊ रोजगार मेला म ओला नौकरी घलो मिल गे। ओमन ए योजना बर मुख्यमंत्री के धन्यवाद घलो करिस। सरगुजा के निखिल सिंह ह ए बेरा म कहिन कि बेरोजगारी भत्ता योजना ले ओला अऊ ओखर बहनी ल आर्थिक सहयोग मिले ले उंखर परेसानी कम होईस हे। ओमन बताईन कि ग्रेजुएशन करे के बाद ओ ह घर म बईठे रिहस। अंबिकापुर के लाइवलीहुड कॉलेज म ओला असिस्टेंट इलेक्ट्रिशियन के प्रशिक्षण मिलिस अब ओला 11 हजार रूपए के नौकरी के ऑफर लेटर घलो मिल गे।
गणेशी केंवट बनावत हे नवा पक्का मकान
सूरजपुर जिला के प्रधानमंत्री आवास योजना-ग्रामीण के हितग्राही गणेशी केंवट ह बताईन कि ए योजना म ओमन ल 01 लाख 20 हजार रुपिया स्वीकृत होए हे। पहिली किस्त म 25 हजार रुपिया के राशि मिले हे जेमा डीपीसी तक के बुता कराए गे हे। कच्चा मकान ले परेशानी होवत रिहिस। अब पक्का मकान मिल गे हे। गणेशी केंवट ह मुख्यमंत्री ल एखर बर धन्यवाद दे हे। नारायणपुर जिला के ग्राम करलखा के भागवत प्रसाद यदु ह बताईन कि ओमन ल 01 लाख 30 हजार रुपिया के स्वीकृति मिले हे। पहिली किस्त 45 हजार रुपिया पा गे हे। ओमन घलो ए योजना बर मुख्यमंत्री ल धन्यवाद दे हे।
मिलाप पटेल बन गे कस्टमर रिलेशनशिप एक्जीक्यूटिव
रायगढ़ जिला के बेरोजगारी भत्ता के हितग्राही मिलाप पटेल ह बताईन कि ओमन ल बेरोजगारी भत्ता के तीन किस्त सरलगहा तीन महीना ले मिलत हे। अब ओला चैतन्य ग्रुप म कस्टमर रिलेशनशिप एक्जीक्यूटिव के नौकरी मिल गे हे। कार्यक्रम म बेरोजगारी भत्ता पवईया युवा मन मुख्यमंत्री बर आभार व्यक्त करत कहिन कि योजना डाहर ले मिलत आर्थिक मदद ले ओमन अपन जरूरत ल पूरा करे के संगे-संग प्रतियोगी परीक्षा के तियारी कर पावत हे। ओमन ल अब कौशल विकास के घलो ट्रेनिंग मिलत हे।
