कोरबा. जनता कांग्रेस छत्तीसगढ़ (जे) के प्रदेस अध्यक्ष अमित जोगी ह एक बड़का बयान देय हे के. कोरबा सीट ले अजीत जोगी के लोकसभा चुनाव लड़े के ऐलान अमित जोगी ह करिन हे.
अमित जोगी के कहिना हे के कोर कमेटी म ए फइसला लेय गे हे. उंखर कहिना हे के , मोर घलो हार्दिक इच्छा हवय के अजीत जोगी कोरबा लोकसभा ले चुनाव लड़य.
कोरबा लोकसभा सीट ले छत्तीसगढ़ के पहिली मुख्यमंत्री अजीत जोगी ही चुनाव लड़ईया हे। अमित जोगी ह बुधवार के कोरबा म ये बात के ऐलान करे हे. कार्यकर्ता मन ल संबोधित करत अमित जोगी ह कांग्रेस उपर आरोप लगात कहिन के कांग्रेस सरकार ह शराब ठेकेदार मन ले 500 करोड़ रुपिया के घूस लेहे हे. बेरोजगारी भत्ता ल लेके उमन सवाल करिन के, सरकार बतावय के अभी तक कोनो बेरोजगार ल बेरोजगारी भत्ता काबर नइ मिले हे.
एती सरकार 30 ठन नवा कोयला खदान खोले के परमिसन तको दे देहे हे. उमन आरोप लगाइन के कोरबा के सांसद ह सिरिफ अपन बेटा के विकास करे हे. हम आप ल बता देवन के पाछू महीना कोरबा म गैर राजनैतिक संगठन छत्तीसगढि़या क्रांति सेना ह जबर लउठी रैली करके छत्तीसगढि़या मन के अस्मिता ल जगा देहे हे. अब अइसे म जोगी जी बर बने खातू-पानी छिंचा गए हे.
Other Articles
सीएम भूपेश बघेल ल ब्रिटिश संसद करही सम्मानित
नंद कुमार साय के एक बार फेर दिस विवादित बयान
