स्वामी आत्मानंद स्कूल बन गे मिसाल, एजुकेशन फ्रेंडली माहोल म लईका मन ल मिलत हे निखरे के मउका

ए हरे हमर सुघ्घर सिक्छा के बेवस्था, आर्थिक तंगी नई बने बिद्या दाई के रद्दा म रोड़ा

दानेश्वरी संभाकर , सहायक संचालक, जनसंपर्क

छत्तीसगढ़ के स्कूली लईका मन म अंग्रेजी माध्यम ले पढ़ई-लिखई बर सुघ्घर माहोल बनत हे। राज्य सरकार कोती ले सुरू करे गे अंग्रेजी स्कूल मन के सरलगहा परयास ह अब जिला मुख्यालय ले लेके विकासखंड स्तर म घलो गरीब अऊ कमजोर वरग के लईका मन बर बरदान बनत हे, अऊ बड़ संख्या म लईका मन इहां पढ़ई-लिखई करत हे।

बता देन ज्यादा बेरा नई होए हे ए स्कूल के घोसना होव म फेर अतेक कम बेरा म स्वामी आत्मानंद अंग्रेजी माध्यम स्कूल पढ़ई लिखई के क्षेत्र म लोकप्रियता हासिल कर डरे हे। राज्य सरकार डाहर ले अंग्रेजी माध्यम के संगे-संग हिन्दी माध्यम के स्वामी आत्मानंद स्कूल सुरू करे जात हे। ए स्कूल मन म विश्वस्तरीय सुविधा दे बर सरकार सरलगहा बुता करत हे अऊ आजो घलो पढ़ई लिखई के विश्व स्तरीय सुविधा दे बर ए स्कूल ह माने जाथे।

247 स्वामी आत्मानंद अंग्रेजी माध्यम स्कूल

प्रदेश म 247 स्वामी आत्मानंद अंग्रेजी माध्यम स्कूल अऊ हिंदी माध्यम के 32 स्कूल संचालित हे। उहें अवईया सिक्छा बछर म 422 स्कूल के संचालन करे जाए के योजना बनाए गे हे। नवा प्रस्तावित स्कूल मन म सरगुजा अऊ बस्तर संभाग के 252 स्कूल ल सामिल होही। एखर ले दूर दराज के अंचल अऊ पिछड़ा इलाका म रहवईया लईका मन ल घलो अंग्रेजी माध्यम ले पढ़ई-लिखई के मउका मिलही। एखर अलावा अंग्रेजी माध्यम स्कूल के सफलता ल देखत राज्य सरकार ह अवईया सिक्छा बछर ले अंग्रेजी माध्यम ले कालेज घलो खोले के निरणय ले हे।

भेंट मुलाकात म दिखिस लोकप्रियता

स्वामी आत्मानंद स्कूल के लोकप्रियता के अंदाजा इही बात ले लगाए जा सकथे कि जेन बेरा म मुख्यमंत्री भूपेश बघेल भेंट-मुलाकात करे बर जेन जेन इलाका म पहुंचिन उहां स्कूल के बड़ मांग घलो आईन। उहें स्कूल म पढ़ईया लईका मन फर्राटेदार अंग्रेजी ह ए बात के गवाही देथे कि स्वामी आत्मानंद स्कूल के परिकल्पना ह कईसे साकार रूप लेवत हे। ए स्कूल के खुले ले गरीब अऊ कमजोर तबका के प्रतिभावान लईका मन के अभिभावक मन ल निजी स्कूल के भारी-भरकम फीस ले निजात मिलिस। जिहा नाममात्र के फीस ले अंग्रेजी माध्यम ले सिक्छा अऊ संगे-संग विश्वस्तरीय सुविधा मिलत हे।  

अढई लाख लईका मन ल मिलत हे लाभ

बता देन कि 3 जुलाई 2020 म प्रदेश म स्वामी आत्मानंद स्कूल के सबले पहिली सुरूआत करे गे रिहिस। योजना के तहत सुरू करे गे 247 स्कूल म लगभग अढई लाख लईका मन पढ़ई-लिखई करत हे। जम्मो स्कूल म अत्याधुनिक लाइब्रेरी, लैंग्वेज लैब, कम्प्यूटर और साइंस लैब के संगे-संग टेनिस अऊ बैडमिंटन के संग कई खेल के सुविधा कराए गे हे।