स्कूल के छुट्‌टी फेर गुरुजी मन ल बना दिस तेंदूपत्ता परवेक्षक.. जंगल म देवत हे ड्यूटी

नारायणपुर. स्कूल म गर्मी के छुट्‌टी लग गे हे फेर गुरुजी मन के ड्यूटी चलत हे। दरअसल जिला म तेंदूपत्ता संग्रहण करईया मन संग गुरुजी मन ल घलो लगा दे गे हे। ऐ गुरुजी मन ल संग्रहण कार्य बर परवेक्षक बनाए गे हे। इही नहीं माई लोगन अऊ दिव्यांग गुरुजी मन के घलो ड्यूटी लगाए गे हे। वन विभाग म करमचारी नई होए के खामियाजा ऐ शिक्षक मन उठावत हे।

जिला कलेक्टर पीएस एल्मा ह एक अपरेल के आदेश जारी कर 79 शिक्षक मन ल तेंदूपत्ता संग्रहण केन्द्र के निगरानी बर फड़ अभिरक्षक नियुक्त करे हे। ऐखर सती गुरुजी मन ल मुंधियार त फड़ म नजर रखे बर पड़त हे। जंगली इलाका म मुंधियार तक तेंदूपत्ता के खरीददारी होवत हे। एखर चलत गुरुजी मन ल रतिहा तक रूके के मजबूरी हे।

जिला म तेंदूपत्ता के खरीदी बर परिक्षेत्र छोटेडोंगर, धौड़ाई, बेनूर, फरसगांव, नारायणपुर, पूर्व सोनपुर अऊ पश्चिम सोनपुर ल समिति ल संग्रहण केन्द्र बनाए गे हे। जेमा वनपाल अऊ वनरक्षक मन संग गुरूजी मन के ड्यूटी लगाए गे हे। जिला प्रशासन ह अबूझमाड़ के गुरुजी मन ल राहत देत कोंगे के समिति म अवईया संग्रहण केन्द्र म काखरो ड्यूटी नई लगा हे। उहां वनरक्षक मन द्वारा खरीदी व्यवस्था के संचालन करे जात हे। अईसन केन्द्र पांगुड, बाला, नुरपदर, बोरानीर, गारपा हे।

अईसने सोनपुर समिति के संग्रहण केन्द्र बेचा, कुंदला, किहकाड, ढूटाखार, कोहकामेटा, बासिंगबहार, बोगान, गुन्दुल और हेटाडकसा म भी गुरुजी मन ल नई भेजे गे हे। उहें गढबेंगाल समिति के 16 संग्रहण केन्द्र म कई महिला शिक्षक मन ल फड़ अभिरक्षक बनाए गे हे।