जय जोहार। सीएम भूपेश बघेल ह आज अपन निवास कार्यालय म लोकप्रिय राजनेता स्वर्गीय बिसाहू दास महंत अउ लोक नाचा के जनक दाऊ दुलार सिंह मंदराजी के जयंती म ओखर चित्र म माल्यार्पण कर नमन अउ श्रद्धांजलि दीन। वोहा लोकप्रिय राजनेता स्वर्गीय श्री बिसाहू दास महन्त ल स्मरण करत हुए किहीन कि ओखर पूरा जिनगी जनसेवा ले जुड़े रिहीन ।
श्री महन्त ह अविभाजित मध्यप्रदेश म विधायक अउ मंत्री के रूप म प्रदेस के विकास बर अपन अमूल्य सेवा दीन। सीएम श्री बघेल ह किहीन कि स्वर्गीय श्री बिसाहू दास महन्त के सपना के अनुरूप नवा छत्तीसगढ़ के निर्माण के दिसा म राज्य सरकार आगू बढ़त हे।
मुख्यमंत्री ह स्वर्गीय दाऊ दुलार सिंह मंदराजी दाऊ जी के अमूल्य योगदान ल याद करत हुए किहीन कि दाऊ मंदराजी ह ‘नाचा‘ ल पुनर्जीवित अउ ओला बचाए रखे बर अपन पूरा जिनगी समर्पित कर दीन । वोहा नाचा ल सामाजिक कुरीति के प्रति जनचेतना जगाए के माध्यम बनाइन । सीएम श्री बघेल ह किहीन कि दाऊ जी ह लोक कलाकार ल संगठित कर छत्तीसगढ़ी नाचा-गम्मत ल विश्वपटल म स्थापित करे म महत्वपूर्ण भूमिका निभाईन। ए अवसर म पंचायत अउ ग्रामीण विकास मंत्री रविन्द्र चौबे ह घलो दूनों विभूति ल विनम्र श्रद्धांजलि दीन ।
