मुख्यमंत्री ह लेफ्टिनेंट नर्सिंग ऑफसर वीणा साहू अउ राष्ट्रीय इंडियन मिलिट्री कॉलेज म चयनित आदित्य सिंह के देश सेवा के जज्बा ल सराहिन
रायपुर। मुख्यमंत्री विष्णु देव साय ह भारतीय सेना म लेफ्टिनेंट नर्सिंग अफसर के रूप म सेवा देवत छत्तीसगढ़ के बेटी वीणा साहू अउ राष्ट्रीय इंडियन मिलिट्री कॉलेज म चयनित बस्तर संभाग के फरसगांव के आदित्य सिंह के भारतीय सेना म जाए के जज्बे बर सराहना करिन। ए दुनों युवा मन साधारण परिवार ले हे, जेमन देश के सेवा अउ भारतीय सेना म शामिल होए के अपन जुनून अउ जज्बा के चलत ए मुकाम ल हासिल करिन हे। वीणा साहू बालोद जिले के जमरूवा गांव के एक किसान चेतन साहू के बेटी हे। वीणा के सपना मिलिट्री म जाए के रिहीन, जेन ल ओहा अपन लगन अउ मेहनत ले पूरा कर दिखाइन। आदित्य सिंह के पिता जयप्रकाश सिंह जनरल स्टोर चलाथे। आदित्य के पिता एयरफोर्स म जाना चाहत रिहीन, लेकिन सफल नई हो सकिन। ओखर ये सपना ओखर बेटा ह अपन मेहनत अउ लगन ले साकार कर दिखाइन।
मुख्यमंत्री साय ह वीणा साहू ले फोन म बात करिन, अउ ओखर उपलब्धि बर ओला बधाई अउ शुभकामनाएं दिस अउ उखर उत्साहवर्धन करिस। वीणा साहू छुट्टी म अपन घर आए हे। मुख्यमंत्री ह कहिन कि बेटी मन हमार स्वाभिमान हे, छत्तीसगढ़ के शान हे। ओहा वीणा साहू ले किहिन कि आपमन छत्तीसगढ़ के नाम रौशन करे हव, छत्तीसगढ़ के नाम ऊंचा करे हव। आपमन के ए उपलब्धि प्रदेश के असंख्य युवा मन बर प्रेरणा के स्त्रोत हरय। वीणा साहू ह कहिन कि नर्सिंग ऑफिसर बनके हमन लोग मन के सेवा करत हे, जेन ह देश के सेवा करत हे। ए हमर बर गर्व के बात हे।
मुख्यमंत्री ह आदित्य सिंह के ए उपलब्धि बर ओखर पिता ले फोन म बात करिन अउ ओला शुभकामनाएं दिन। मुख्यमंत्री ह किहिन कि आदित्य के ये सफलता पूरा प्रदेश बर गर्वित करे वाला पल हे, आदित्य ल घलो ए उपलब्धि बर गाड़ा- गाड़ी बधाई अउ शुभकामना। मुख्यमंत्री ह आदित्य के पिता ले कहिन कि आदित्य के पढ़ाई के चिंता झन करव, जेन भी जरूरी रही सहयोग करबो। आदित्य ह छत्तीसगढ़ का मान बढ़ाइन हे। छत्तीसगढ़ के युवा देश अउ प्रदेश के सेवा म सदैव तत्पर हे।
