गांव के चौपाल म दीखिस मुख्यमंत्री के सादगी अउ संवेदनसीलता

पीपर के रुख तरी खाट म बइठ के गांव वाले ले करिन सीधा गोठ-बात: दुख-पीरा सुनिन अउ मौका म हे समाधान के निरदेस दीन

ग्राम कोसला म “महतारी सदन” अउ हायर सेकेंडरी स्कूल भवन बनाय के घोषणा

रायपुर. सुसासन तिहार के तहत मुख्यमंत्री विष्णुदेव साय ह आज जांजगीर-चांपा जिला के पामगढ़ बिकासखंड के तहत आने वाला ग्राम कोसला के अचकच (औचक) निरिक्सन करिन। मुख्यमंत्री श्री साय के गांव पहुंचत हे पूरा इलाका म उछाह के माहौल बन गे। मुख्यमंत्री श्री साय के अब्बड़ सहज, मयारुक अउ सादगी वाले रूप ओकर मन ला तब देखन ला मिलिस, जब वे कउनो तड़क-भड़क के बिना गांव के पीपर रुख के छांव तरी लगे चौपाल म गांव वाले मन के बीच म खाट ऊपर बइठ के ओमन ले सीधा गोठ-बात करे लगिन। ये दरसन गांव के मनखे मन बर यादगार बन गे अउ चौपाल ह मया के गोठ अउ संवेदनसील सरकार के मिसाल बन गे।

मुख्यमंत्री श्री साय ह चौपाल म गांव वाले , माई लोगन (महिलाएं) अउ किसान मन ले सीधा गोठ-बात करत सरकार के अलग-अलग जनकलियानकारी योजना के काम-काज के जानकारी लीन। ओमन गांव वाले के दुख-पीरा (समस्याएं) ला धियान लगा के सुनिन अउ संबधित अधिकारी ला तुरते दूर करे के निरदेस दीन।

मुख्यमंत्री ह कहिन कि सुसासन तिहार के उदेस सरकार अउ जनता के बीच म सीधा गोठ-बात करवाना अउ योजना के लाभ ला आखिरी मनखे तक पहुंचाना हे। ओमन कहिन कि सरकार ह लगातार माई लोगन, किसान मन, गरीब अउ गरजू परिवार मन के जिनगी म सुघर बदलाव लइया बर काम करत हे।

गांव वाले मन ले गोठ-बात के बीच म मुख्यमंत्री ह बिसेस रूप से पूछिन, “पटवारी ह रोज-रोज गांव आथे कि नहीं?” गांव वाले मन कोति ले ‘हां’ कहे जाय म मुख्यमंत्री ह गांव के पटवारी शत्रुघन कुर्रे ला निरदेस दीन कि गांव वाले मन अउ किसान मन के तकलीफ ला तुरते दूर करव, ताकि लोगन ला छोटे-छोटे काम बर भटके बर झन लगे। मुख्यमंत्री ह साफ कहिन कि आम मनखे मन ला कउनो किसम के तकलीफ नहीं होना चइही।

चौपाल के बीच म ग्राम कोसला के सावित्री कश्यप ह मुख्यमंत्री ला बताइस कि ओला ‘महतारी वंदन योजना’ के तहत हर महिना नियम से पइसा मिलत हे। ओमन कहिन कि ये योजना ले परिवार के छोटे-बड़े जरूरत ला पूरा करे म अब्बड़ मदद मिलत हे अउ अपन गोड़ म ठाढ़े होय बर संबल मिले हे। मुख्यमंत्री ह माई लोगन मन ले मयारुक गोठ करत कहिन कि महतारी वंदन योजना ह प्रदेश के लाखो माई लोगन मन बर कमाई के एक ठन बिसवास बनत हे।

येतीच बीच म गांव के “लखपति दीदी” नीमा तिवारी ह मुख्यमंत्री ला बताइस कि बिहान योजना ले जुड़े के बाद ओला सुरू म 15 हजार रुपिया के मदद मिलीस। एकर बाद ओमन आटा चक्की के ब्यवसाय सुरू करिन अउ आज ओकर मेर पांच ठन आटा चक्की चलत हे। मुख्यमंत्री ह ओकर ये सफलता के बड़ाई करिन अउ कहिन कि वे गांव के दूसर माई लोगन मन ला घलो स्व-सहायता समूह ले जोड़ के अपन गोड़ म ठाढ़े होय बर आघू लाय के कोसिस करंय।

मुख्यमंत्री ह गांव म प्रधानमंत्री आवास योजना के काम-काज के घलो जानकारी लीन। अधिकारी मन ह बताइन कि पाछू ढाई बरिस म ग्राम कोसला म 474 परिवार ला प्रधानमंत्री आवास योजना के मंजूरी दे गे हे। मुख्यमंत्री ह कहिन कि ‘आवास प्लस’ सरवे के दुआर ले छूटे हुए सबो पात्र मनखे मन ला घलो योजना के लाभ दिये जाही। ओमन कहिन कि सरकार बने के बाद सबले पहिली 18 लाख प्रधानमंत्री आवास के मंजूरी दिये गे रीहिस अउ अब हजारों परिवार के पक्का घर के सुपना पूरा होवत हे।

मुख्यमंत्री विष्णु देव साय ह जन चौपाल के बीच म गांव वाले मन के मांग ऊपर तुरते कारवाही करत बड़े घोषणा घलो करिन। माई लोगन मन के सुबिधा अउ ओमन ला आघू बढ़ाए बर धियान म रखत ओमन ग्राम कोसला म “महतारी सदन” बनाय के घोसन करिन। संग म क्षेत्र म पढ़ई-लिखई के सुघर सुबिधा बर हायर सेकेंडरी स्कूल भवन बनाय के घलो घोसन करिन। मुख्यमंत्री के ये घोषणा ले गांव वाले मन, बिसेस करके माई लोगन अउ लइका मन म अब्बड़ उछाह के माहौल देखन ला मिलिस।

मुख्यमंत्री ह कहिन कि राज सरकार ह किसान मन के हित म लगातार काम करत हे अउ किसान मन ले 3100 रुपिया प्रति क्विंटल के भाव ले धान खरीदे जावत हे, जऊन ले ओमन ला अपन मिहनत के सुघर दाम मिलत हे। ओमन कहिन कि सुसासन तिहार के दुआर ले जनप्रतिनिधि अउ अधिकारी गांव-गांव पहुंच के लोगन के दुख-पीरा ला दूर करत हें अउ सरकार के योजना ला आखिरी मनखे तक पहुंचाय के कोसिस करे जावत हे।

ये मोका म बित्त मंत्री ओ पी चौधरी, मुख्यमंत्री के प्रमुख सचिव सुबोध कुमार सिंह, विशेष सचिव रजत बंसल, कलेक्टर जन्मेजय महोबे, पुलिस अधीक्षक निवेदिता पाल के संग अब्बड़ अकन गांव के मनखे मन उपस्थित रीहिन।