जशपुर. लोकसभा चुनाव के नजदीक आत ही जोगी कांग्रेस के समर्थक खुद ल कांग्रेस म वापस ले जाये के पोस्ट सोसल मीडिया म डालत हे, जेखर ले कांग्रेस पार्टी म अंतर्कलह मच गे हे.
पदाधिकारी मन ल दीस ये चेतावनी, इमन ल अंदर करहू त हमन घर म बइठ जाबो
कांग्रेस के कार्यकर्ता अजीत जोगी के पार्टी के कट्टर समर्थक मन के चुनाव म काम करे म पार्टी के नेतामन के कहिना हे के इमन ल अंदर करहू त हमन घर म बइठ जाबो. अतना ही नई जिला कांग्रेस कार्यालय के बइठक म कांग्रेस के लोकसभा प्रत्याशी लालजीत राठिया अउ जिला के दिग्गज नेतामन आघू कांग्रेस कार्यकर्ता मन ह खूब हंगामा करिन.
दरअसल हाल के दिन म ह जशपुर जिला के कई अजीत जोगी के बेहद करीबी अउ कट्टर समर्थक मन ह कांग्रेस म सामिल होये के बात कहिके मुख्यमंत्री भूपेश बघेल के संग फोटो सोसल मीडिया म वायरल करत हे. हालांकि सामिल होय के बात कांग्रेस पार्टी के नेता स्वीकार नई करत हे. जिला कांग्रेस सम्मेलन म इंही बात मन ल लेके कांग्रेस के कार्यकर्ता मन ह खूब हंगामा करिन अउ जिलाध्यक्ष पवन अग्रवाल ल सोझे चेतावनी दे दीस के अजीत जोगी के कट्टर समर्थक शशि भगत, ताहिर अली, हलीम फिरदौसी, हंसराज अग्रवाल समेत अन्य लोग अगर कांग्रेस के झंडा उठात हे त कांग्रेस के समर्पित कार्यकर्ता मन चुनाव प्रचार करे ले बजाय घर म बइठना पसन्द करही.
अइसे नई के कांग्रेस पार्टी के जुम्मेदार पदाधिकारी मन ह जोगी कांग्रेस ले कांग्रेस म प्रवेश करे के बात म स्थिति स्पष्ट नई करिस, जिलाध्यक्ष पवन अग्रवाल ह साफ करिन के जे जोगी कांग्रेस के कार्यकर्ता कहिथे के मोर कांग्रेस प्रवेस होगे हे वो झूठ बोलत हे. कांग्रेस जिलाध्यक्ष ह इमन ल मउकापरस्त कहिके इमन के कांग्रेस म सामिल होय के बात ल सिरा ले खारिज कर दिस. लोकसभा प्रत्याशी लालजीत सिंह राठिया ह घलो ये मामला म जोगी कांग्रेस के लोगन मन के पार्टी म आए के बात ल खारिज करिस हे.
