mahasamund : केंद्र सरकार के पेट्रोल ,डीजल अउ रसोई गैस म एक्साइज ड्यूटी घटाय के निर्णय स्वागत योग्य – पप्पू पटेल
जय जोहार। (mahasamund) तुमगांव नगर पंचायत उपाध्यक्ष अउ भाजपा मंडल अध्यक्ष पप्पू पटेल ह केंद्र सरकार डहार ले पेट्रोल अउ डीजल म एक्साइज ड्यूटी घटाय के निर्णय ल देस के जनता बर बड़का राहत बताय हे। वो हा देस के प्रधानमंत्री नरेंद्र मोदी के प्रति आभार प्रकट करत हुये केन्द्र सरकार ल जनता ल दे राहत बर धन्यवाद देहे ।
वो हा किहीन कि पेट्रोल म केंद्रीय उत्पाद शुल्क (एक्साइज ड्यूटी) ल 8 रुपिया अउ डीजल म 6 रुपिया कम कर देहे जेखर ले पेट्रोल के कीमत 9.5 रुपिया प्रति लीटर अउ डीजल के भाव म 7 रुपिया प्रति लीटर कमती हो जाही । प्रधानमंत्री उज्ज्वला योजना के नौ करोड़ ले जादा लाभार्थी ल 200 रुपिया सब्सिडी ले सीधा हमर माता अउ बहिनी ल मदद मिलही ।
वो हा किहीन कि केंद्र सरकार डहार ले जनता ल बड़का राहत दे गेहे , अब राज्य सरकार के बारी हे । वो हा सरलग केंद्र सरकार म आरोप लगइया कांग्रेस के नेता ले ए दिसा म पहल करे के अपील करत हुये किहीन कि छत्तीसगढ़ के मुख्यमंत्री भूपेश बघेल ह छत्तीसगढ़ के जनता ल बताये कि केंद्र सरकार डहार ले बड़का राहत दे जाय के बाद छत्तीसगढ़ म कांग्रेस के सरकार ह छत्तीसगढ़ के जनता ल राहत दे बर पेट्रोल डीजल म कतना वैट कम करही ।
