मुख्यमंत्री विष्णुदेव साय ह हितग्राही मन ल सउंपिन प्रधानमंत्री आवास योजना के चाबी
रायपुर. “अपन पक्का घर ह सिरिफ ईंट अउ सीमेंट के ढांचा नोहे, भलुक सुरक्षा, सम्मान अउ नवा जीउन के मजबूत नींव होथे।” धमतरी म आयोजित सुशासन तिहार 2026 के बेरा म ये भाव ओ समे जीवंत हो उठिस, जब मुख्यमंत्री विष्णुदेव साय ह प्रधानमंत्री आवास योजना (ग्रामीण) के अंतर्गत हितग्राही मन ल प्रतीकात्मक चाबी सउंपके ओमन के बछर मन जुन्ना सपना ल साकार करिन। सुशासन तिहार म भाटगांव के हितग्राही कुमारी यादव अउ लता साहू ल मुख्यमंत्री श्री साय के हाथ ले आवास के चाबी प्रदान करे गिस। बछर मन तक कच्चा मकान म कठिन परिस्थिति म जीउन बिताए वाले ए परिवार मन बर ये छन ह सिरिफ कउनो सरकारी योजना के लाभ मिले भर के नई रहिस, भलुक आत्मसम्मान, सुरक्षा अउ स्थायित्व ले भरे नवा जीउन के सुरूआत के प्रतीक बन गे।
हितग्राही कुमारी यादव ह बताइस कि बरसात के दिन म ओकर परिवार ह लगातार परेशानी मन के सामना करत रहिस। कच्चे घर के चुहत छत (टपकती छत) अउ कमजोर दीवाल मन के सेती लइका मन के पढ़ाई अउ परिवार के सुरक्षा ह हरदम चिंता के बिसय बने रहय। ओमन कहिन कि प्रधानमंत्री आवास योजना के तहत पक्का घर मिले ले अब ओकर परिवार ह सुरक्षित महसूस करत हावय अउ लइका मन के भबिस्य ल लेके नवा उम्मिद जगिस हावय।
अइसनेच लता साहू ह कहिस कि पहिली हर मौसम ह चिंता लेके आवत रहिस, फेर अब पक्का घर मिले ले ओकर परिवार ल सम्मानपूर्वक जीउन जिए के आत्मविश्वास मिलिस हावय। ओमन मुख्यमंत्री विष्णुदेव साय के प्रति आभार प्रगट करत कहिन कि ये योजना ह गरीब परिवार मन बर कउनो बरदान ले कम नोहे।
मुख्यमंत्री विष्णुदेव साय ह ए मउका म कहिन कि राज्य सरकार ह अंत्योदय के भावना के संग काम करत हावय अउ हर एक पात्र अउ जरूरतमंद परिवार तक योजना मन के लाभ पहुंचाना सरकार के सबले पहिली प्राथमिकता ए। ओमन कहिन कि प्रधानमंत्री आवास योजना ह सिरिफ मकान बनाए के योजना नोहे, भलुक गरीब परिवार मन के जीउन म सुरक्षा, स्थायित्व अउ सामाजिक सम्मान सुनिश्चित करे के एक प्रभावी माध्यम ए।
मुख्यमंत्री श्री साय ह कहिन कि सुशासन तिहार के माध्यम ले सरकार के योजना मन ल सोझ जन-जन तक पहुंचाए जात हावय अउ मनखे मन के समस्या मन के तुरते निरकरण सुनिश्चित करे जात हावय। इही कारन ए कि आज ग्रामीण इलाका मन म बिकास के संग-संग सरकार के प्रति बिसवास घलो मजबूत होत हावय। प्रधानमंत्री आवास योजना ह हजारों परिवार मन के जीउन म सकारात्मक बदलाव लाके ओमन ल सुरक्षित अउ सम्मानजनक जीउन के नवा रद्दा देखाइस हावय।
ए मउका म महासमुंद सांसद रूपकुमारी चौधरी, कुरूद विधायक अजय चन्द्राकर, धमतरी विधायक ओंकार साहू, महापौर रामू रोहरा, जिला पंचायत अध्यक्ष अरूण सार्वा सहित जनप्रतिनिधि अउ भारी संख्या म नागरिक मन उपस्थित रहिन।
