chhattisgarh म समर्थन मूल्य म धान खरीदी के आकड़ा 97 लाख मीट्रिक टन ले होगे पार

जय जोहार। छत्तीसगढ़ (chhattisgarh) म समर्थन मूल्य म धान खरीदी के महाभियान सरलग जारी हे। प्रदेस म समर्थन मूल्य म धान खरीदी के आकड़ा 97 लाख मीट्रिक टन ले पार हो गेहे। धान खरीदी के एवज म 22 लाख ले जादा किसान मन ल लगभग 19,875 करोड़ रुपिया के भुगतान ल बैंक लिंकिंग व्यवस्था के तहत करे गेहे ।

ए बछर धान खरीदी के संगेसंग कस्टम मिलिंग बर सरलग धान के उठाव जारी हे । अब तक 97 लाख मीट्रिक टन धान म ले 82 लाख मीट्रिक टन धान के उठाव बर डीओ जारी करे गेहे, जेखर विरूद्ध मिलर्स डहार ले 71 लाख मीट्रिक टन धान के उठाव ल करे जा चुके हे । अधिकारी मन ह बताइन कि 13 जनवरी के 34 हजार 480 किसान मन ले 1.43 लाख मीट्रिक टन धान के खरीदी करे गेहे । एखर अलावा ऑनलाइन प्राप्त टोकन ले किसान मन ले 9 हजार टन धान के घलो खरीदी होए हे ।

गौरतलब हे कि ए बछर राज्य म 25.96 लाख किसान मन के पंजीयन होए हे, जेमा ले लगभग 2.30 लाख नवा किसान सामिल हे । राज्य म धान खरीदी बर 2617 उपार्जन केन्द्र बनाए गेहे । सामान्य धान 2040 रुपिया प्रति क्विंटल अउ ग्रेड-ए धान 2060 रुपिया प्रति क्विंटल की दर ले खरीदे जात हे ।