ओरछा (अबूझमाड़) म खुलिस पहिली दवई के दुकान

नारायणपुर. शनिवार 13 अप्रैल के दिन देस –प्रदेस बर खास दिन रहिस हे, ये दिन सारा देस म हर्षोल्लास के संग रामनवमीं मनाय जात रिहिस हे, उहें ये दिन नक्सल प्रभावित जिला नारायणपुर के विकासखण्ड ओरछा (अबूझमाड़) बर खासतउर माने जाही. शनिवार 13 अप्रैल रामनवमीं के दिन ओरछा मुख्यालय म पहिली मेडिकल स्टोर्स खोले गिस. ये साहसिक काम माड़िया कुमारी कीरता दोरपा ह कर दिखाइस. दुर्गम क्षेत्र म पहिली दवाई के दुकान खोल के नवां मिसाल पेस करिस हे.

वइसे त सामुदायिक स्वास्थ्य केन्द्र ओरछा म मरीज मन ल सबो आवश्यक दवाई निःशुल्क मिल जाथे. लेकिन कई बार अइसे होथे के कई दवाई मन बर 70 किलोमीटर दूर जिला मुख्यालय नारायणपुर जाएल पड़थे. लेकिन अब ओरछा क्षेत्र के लोगन ल ये दूरी ले निजात मिलही. ये सुखद काम मड़िया जनजाति के कु. किरता ह कर दिखाइस हे. उमन परिवार अउ मित्र मन के आर्थिक सहायता अउ सहयोग ले ओरछा म मावा नाम ले मेडिकल स्टोर्स खोलस. ये ह दुर्गम क्षेत्र के अबूझमाड़िया मन बर जीवनदायनी बनही.

किरता ह बताइस के, चारो डहर घना जंगल-पहाड़ मन ले घिरे दुर्गम इलाका म मेडिकल दुकान खोलना अउ ओला चलाना चुनउती पूर्ण काम रहिस हे. कलेक्टर पीएस एल्मा ह किरता के ये पहल बर भूरी-भूरी प्रसंसा करिस हे. उमन ह जिला प्रसासन कोती ले हरसंभव सहयोग दे के भरोसा दिस हे.