रागी के खेती बढ़ा दिस किसनहा मन के मान, भूपेश राज म सरलगहा बाढ़त हे धन-धान

सगनूराम के संगे-संग दूसर किसान मन के जिनगी म बदलाव, आर्थिक समृद्धि के खुलत हे दुआर

धमतरी जिला म डेढ़ हजार किसान मन धान छोड़ बोवत हे रागी के फसल

लघु धान्य फसल ल बढ़ावा दे बर सरलगहा होवत हे सरकार के उदिम

मनोज सिंह, सहायक संचालक, जनसंपर्क

लघु धान्य फसल मन ल बढ़ावा दे बर राज्य सरकार सरलगहा नवा-नवा उदिम करत हे। एखर असर ए होईस कि अब छत्तीसगढ़ के किसनहा मनखे मन के खेत म वेरायटी देखे बर मिलत हे। धमतरी जिला धान के पैदावार बर प्रसिद्ध हे अऊ एक बेरा रिहिस जब धमतरी जिला म सिरिफ धान के फसल ले जाए फेर अब जमाना बदल गे हे। भूपेश सरकार के जन हितैषी योजना ले प्रभावित हो के अब उहां के किसान मन घलो जादा आमदनी कमाए बर दूसर फसल कोती मुड़त हे।

छत्तीसगढ़ देस के एकेल्ला अईसे राज रहे जिहां कोदो, कुटकी अऊ रागी के संगे-संग दूस मिलेट्स के फसल ल बिसाए बर सरकार ह समर्थन मूल्य घोसित करे हे। अतकेच नई एखर वैल्यू एडिशन के बुता घलो सरलगहा चलत हे। किसान मन ल नगदी फसल ले बर प्रोत्साहित करे के उद्देश्य ले संयुक्त राष्ट्र संघ कोती ले ए बछर ल मिलेट्स वर्ष घोसित करे हे। एखर सती किसानहा मनखे मन के जिनगी म बदलाव घलो दिखाई देवत हे। बदलाव अईसन कि किसान मन के आर्थिक समृद्धि के दुआर खुल गे हे।

राज्य म सुरू करे मिलेट मिशन के सार्थक परिनाम ए ह कही सकत हन कि किसान धान के पुरखौती फसल ल छोड़ रागी, कोदो अऊ कुटकी डहर लहुटत हे। धमतरी जिला डेढ़ हजार किसान दू सौ हेक्टेयर भुईयां म धान के बदला कोदी, कुटकी अऊ रागी के फसल लेवत हे।

सरकार के योजना ले प्रभावित धमतरी जिला के कलारबहार गांव के रहवईया सगनू राम नेताम ह पाछू के कुछ बछर ले धान के बदला रागी के फसल ले के बुता सुरू करिस। सगनू राम ह गोठ-बात करे म कहिस कि पाछू के बछर एक एकड़ म ओ ह रागी के फसल लगाए रिहिस। एखर ले कुल 7 क्विंटल रागी के उत्पादन होईस। ओ ह ए फसल ले बीज तियार करही। ओमन कहिन कि ओमन बीज निगम म 25 हजार अऊ बाजार म लगभग 17 हजार रुपिया के रागी बेचे रेहेंव।  अईसे म सगनू राम धान के खेती करतिस त ओला 10 क्विंटल के हिसाब ले 25 हजार रुपिया के आमदनी होतिस। रागी के खेती ले 15 ले 17 हजार रुपिया के अतिरिक्त आमदनी होगे।  एखर बर संबंधित विभाग ले ओला निःशुल्क बीज अऊ वर्मी कम्पोस्ट खाद प्रदान करे गे रिहिस।

सगनू राम ह रागी के विशेषता बतात कहिन कि ए ह अब्बड़ पौष्टिक अऊ लाभप्रद हे। ए बर पानी के घलो बचत होथे उहें समय घलो कम लागथे। संगे-संग 125 दिन म लुए के लईक फसल हो जाथे अऊ जादा देखरेख के घलो जरूरत नई पड़े। इही कारण हे कि सगनू राम के खेती ले प्रेरित होके आसपास के दूसर किसान मन घलो लघुधान्य फसल उगाए बर प्रोत्साहित होए हे।            

सरकार देवत हे किसान मन सब्सिडी

छत्तीसगढ़ देस के एकमात्र अईसे राज्य ए जिहां कोदो, कुटकी अऊ रागी के समर्थन मूल्य घोसित करे गे हे। कोदो-कुटकी 3000 रुपिया प्रति क्विंटल के दर ले अऊ रागी 3378 रुपिया के दर ले बिसाए जात हे। एखर अलावा धान के बदला दूसर फसल ले बर राजीव गांधी किसान न्याय योजना ले इनपुट सब्सिडी घलो दे जात हे। सरकार ह धान के बदला दूसर उद्यानिकी फसल लेवईया किसान ल 10 हजार रुपिया हर बछर के हिसाब ले मान सहायता राशि के रूप म देवत हे

मिलेट्स खेती के बढ़त हे रकबा

पोषक तत्व ले भरपूर मिलेट अनाज के सरलगहा मांग बढ़त हे। बढ़त मांग ल देखत किसान घलो ए फसल के खेती म रूचि लेवत हे। रागी जेन ल छत्तीसगढ़ म मड़िया के नाव ले जाने जाथे। छत्तीसगढ़ म सुरू ले मिलेट मिशन कोती ले किसान मन ल ए फसल बर प्रोत्साहित करे के उदिम करे जात हे। किसान मन ल बीज से संगे-संग दूसर सहायता घलो मिलत हे। मंडी म रागी के कीमत घलो बड़ अच्छा मिलत हे। एखर खेती घलो जादा कठिन नोहे अईसे में किसान कम मिहनत ले जादा कमई कर सकत हे।

रागी म लाभकारी गुण

रागी हाइवेल्यू क्रॉप, कैल्शियम, आयरन जईसे खनिज तत्व मन ले परिपूर्ण होथे। सात ही एमा फोलिक एसिड, एमीनोएसिड, एन्टी एजेंट, एंटी आक्सीडेंट जईसे पोषक तत्व घलो पाए जाथे। इही कारण एला मोटापा, डायबटिस, रक्तचाप जईसे बीमारी के रोकथाम बर बऊरे जाथे। उहें कुपोषण ले मुक्त अऊ गर्भवती माई लोगन मन घलो फायदामंद हे। तनाव, अवसाद ल दूर करे म घलो रागी सहायक हे। रागी म कैल्शियम के मात्रा सर्वाधिक पाए जाथे जेखर उपयोग ले हड्डी मजबूत होथे।