पुलिसिया गुण्डागर्दी मामला ह तूल पकड़ीस.. हो ही कड़ा कार्यवाही

रायपुर। महामसुंद के निर्दलीय विधायक विमल चोपड़ा अउ उंखर समर्थक मन के संग पुलिसिया गुण्डागर्दी मामला ह अब तूल पकड़त जात हे। घटना ले नाराज सरकार ह कहिन के ये मामला म कड़ा कार्यवाही करे जाही अउ दोषी मन ल नइ बख्शे जाय।
महासमुंद के घटना ले निश्चित रूप म राज्य सरकार के छवि धूमिल होवत दिखत हे। घटना के पूरा जानकारी राज्य के मुखिया तक घलो पहुंच गेहे येखर संगे -संग निर्दलीय विधायक के पिटाई ले जनमानस म फइले असंतोष अउ आक्रोश घले लो उमन ल अवगत करा दे गेहे । माने जात हे के येकर चलत अउ जिला के रहइया मन के विस्वास ल बनाय रखे बर अब कड़ी कार्यवाही होही।
महासमुंद के स्थानीय पुलिस के बर्बरतापूर्वक ये कार्रवाई ले राज्य शासन म घलोक नाराजगी देखे जात हे। येकर बाद अब गुरुवार के मुख्यमंत्री डॉ. रमन सिंह ह मामला म जांच के आदेश देय हे। अब ये मामला म तेजी ले जांच होही। माना ये जात हे कि निश्चित तौर म ये मामला म बड़ी कार्रवाई होना तय हे।