रायपुर. मुख्यमंत्री भूपेश बघेल ह आज इहां अपन निवास कार्यालय म नवा कलेवर म प्रकाशित ‘छत्तीसगढ़ नमन‘ के विमोचन करिन. मुख्यमंत्री ह बिना शुल्क के आंतरिक वितरन बर हर हफ्ता प्रकाशित होवइया ए प्रकाशन बर जनसम्पर्क अउ छत्तीसगढ़ संवाद के विभागीय अधिकारी मन अउ कर्मचारी मन ल हार्दिक बधाई अऊ शुभकामना दीन. उमन आशा व्यक्त करिन के एखर माध्यम ले दूर दराज क्षेत्र के नागरिक मन ल महत्वपूर्ण शासकीय योजना अउ कार्यक्रम मन के जानकारी सरलता ले मिल पाही.
हम आप ल बता देवन के छत्तीसगढ़ जनमन के अंक म राज्य सरकार के ऐतिहासिक फैसला मन के, नवा सरकार के योजना मन के संगें-संग नवा छत्तीसगढ़ गढ़े बर राज्य सरकार कोति ले उठाए जात कदम मन उपर मुख्यमंत्री भूपेश बघेल के संग बातचीत घलोक रोचक शैली म ‘यह बदलाव के दौर है…‘ सीरसक ले प्रकाशित करे गए हे.
ए अंक म जल संरक्षण ल लेके छत्तीसगढ़ सरकार के परयोग म पर्यावरणविद मेघा पाटकर, छत्तीसगढ़ सरकार के फैसला मन उपर वरिष्ठ लेखक अऊ पत्रकार वेदप्रताप वैदिक के विचार, राज्य सरकार के बजट उपर अर्थशास्त्री प्रोफेसर अरूण कुमार के विश्लेषण प्रकाशित करे गए हे.
अइसनहे जमीन वापसी के फैसला उपर समाजशास्त्री डॉ. वर्जिनियस खाखा के विचार, साहित्य अउ सृजन रस्ता म थाती कॉलम म डॉ. नरेन्द्र देव वर्मा के व्यक्तित्व उपर प्रकाश डाले गए हे. येमा ख्याति प्राप्त साहित्यकार हरिहर वैष्णव के बस्तर के मीठ बोली प्रकाशित करे गए हे.
कला अउ संस्कृति ल समर्पित पेज म पंडवानी के तपस्विनी तीजन बाई अऊ कला साधक अनूप रंजन पाण्डेय के काम मन उपर, मुख्यमंत्री के नरवा, गरवा, घुरवा अऊ बारी योजना उपर मुख्यमंत्री के कृषि सलाहकार प्रदीप शर्मा अऊ मध्यप्रदेश के पहिली मुख्य सचिव शरतचन्द्र बेहार के ज्ञानवर्धक लेख घलोक प्रकाशित करे गए हे.
विमोचन के बेरा म मुख्य सचिव सुनील कूजुर, राजस्व सचिव एन.के. खाखा, मुख्यमंत्री के संयुक्त सचिव टामन सिंह सोनवानी, जनसम्पर्क आयुक्त-सह-संचालक तारन प्रकाश सिन्हा, कलेक्टर रायगढ़ यशवंत कुमार, मुख्यमंत्री के सलाहकार रूचिर गर्ग, संवाद के संचालक उमेश मिश्रा अउ बीबीसी संवाददाता आलोक पुतुल घलोक उपस्थित रहिन.
