सरकार के ए फइसला ले कवर्धा-पंडरिया के 82 गांव के लोगन मन होगे खुश  ….वजह जानव

रायपुर। भूपेश सरकार ह  एक बेर फेर भाजपा सरकार के लेगे फइसला ल पलट देय हे।  सरकार के ए फइसला ले प्रभावित गांव मन के लोग मन ह खुश हो गेहे। ए गांव मन के एक प्रतिनिधि मंड़ल वन मंत्री मोहम्मद अकबर ले रायपुर म आकर मिलिस अउ उमन ल धन्यवाद ज्ञापित करिन हे।  

दरअसल, कबीरधाम जिला  के कवर्धा- पंडरिया के 82 गांव बाक्साइट खनन बर  वेदांत समूह के कंपनी भारत एल्युमिनियम कंपनी(बाल्को) ल देय ते तइयारी  पहिली के भाजपा सरकार ह करे रहिस हे। लेकिन राज्य म कांग्रेस नेतृत्व म बने सरकार ह ए निरनय ल रोक दिस हे।   सबले पहिली प्रभावित गांव मन म जमीन के खरीद फरोख्त म 12 साल ले लगे रोक हटा लेय गिस हे। मुख्यमंत्री भूपेश बघेल ह कवर्धा के विधायक अउ सरकार के मंत्री मोहम्मद अकबर के पहल  म ए कदम उठाय हे।

हाल ही म राज्य सरकार के राजस्व अउ आपदा प्रबंधन विभाग ह कबीरधाम जिला के 82 गांव के निवासी मन के हक म आदेस जारी करिस हे। एमा  पूर्ववर्ती भाजपा सरकार के कार्यकाल  2007 म जारी आदेस क निरस्त करे गेहे। ए आदेस म 82 गांव के लोग न के निजी स्वामित्व भूमि के खरीदी-बिक्री  अउ पंजीयन म रोक लगाए गे रहिस हे।  सरकार ह मानिस हे के ए रोक भू-राजस्व संहिता 1959 के धारा 165(6) के प्रावधान के विपरीत पाए गिस हे।  सरकार के ए फइसला ले  प्रभावित गांव मन के लोगन म खुशी के मउहल हे। ए गांव मन के एक प्रतिनिधि मंड़ल वन मंत्री मोहम्मद अकबर ले मिलिस अउ उमन ल धन्यवाद ज्ञापित करिन हे।