मुख्यमंत्री बघेल अऊ स्वास्थ्य मंत्री सिंहदेव के रणनीति ह प्रदेश म कोरोना ल करिस नियंत्रित- फूलोदेवी नेताम
जय जोहार रायपुर…. राज्यसभा सांसद फूलोदेवी नेताम ह कोरोना वायरस ल नियंत्रण म रखे बर प्रदेश के मुखिया भूपेश बघेल अऊ स्वास्थ्य मंत्री टीएस सिंहदेव ल श्रेय दे हे। वो हा बताइस कि बस्तर क्षेत्र म सबो बाहर ले आए व्यक्ति मन के जांच हो चुके हे। संगेसंग सबो नागरिक मन ल घर म ही रहे के सलाह दे जात हे।
राज्यसभा सांसद ह बताइस कि बस्तर क्षेत्र म रहवइया सबो गरीब, मजदूर अऊ जरूरतमंद मन ल राशन के संगेसंग फूड पैकेट वितरित करे जात हे, जेखर ले कोनो भूखा न सोय। संगेसंग ए सेवा ल घर पहुंच घलो शुरू करे गे हे, जेखर निगरानी पुलिस प्रशासन ह करत हे।
वो हा बताइस कि स्वास्थ्य विभाग, जनप्रतिनिधि अऊ पुलिस प्रशासन के संयुक्त तत्वावधान म लॉकडाउन के कड़ाई ले पालन कराए जात हे। संगेसंग राज्य शासन के आदेशानुसार सबो ल अनिवार्य रूप ले मास्क लगाए बर नसीहत दे जात हे। वो हा बताइस कि राशन दुकान मन म कोनो प्रकार के गड़बड़ी नई मिलत हे। सबो ल पर्याप्त मात्रा म नियमानुसार राशन उपलब्ध कराए जात हे।
