केमिकल अउ उद्योग के आपदा बर सचेत रहे के जरूरत: होही राज्य स्तरीय मॉक एक्सरसाईज

रायपुर. उद्योग अउ केमिकल ले होय वाला आपदा के संबंध मा आज मंत्रालय महानदी भवन मा राज सरकार के अलग-अलग विभाग के अधिकारी-करमचारी मन बर राज्य स्तरीय औद्योगिक आपदा प्रशिक्षण कार्यक्रम (ट्रेनिंग) रखे गे रहिस। ए ट्रेनिंग प्रोग्राम मा भारत सरकार के गृह मंत्रालय, राष्ट्रीय आपदा प्रबंधन प्राधिकरण (NDMA) नई दिल्ली के बड़े अधिकारी मन ह वीडियो कॉन्फ्रेंसिंग के जरिया ले रद्दा देखाइन।

ट्रेनिंग मा जब कोनो औद्योगिक या केमिकल आपदा आ जाथे, त ओ बखत का-का सावधानी बरतना हे अउ ओकर बर पहिली ले का-का तैयारी करके रखना हे, एखर बारे मा सबो बिभाग के अधिकारी मन ला सिखाय गिस।

आने वाला दिन मा होही मॉक एक्सरसाईज राष्ट्रीय आपदा प्रबंधन प्राधिकरण नई दिल्ली के अधिकारी मन ह वीडियो कॉन्फ्रेंसिंग मा बताइन कि आने वाला दिन मा छत्तीसगढ़ मा केमिकल अउ औद्योगिक आपदा ला लेके राज्य स्तरीय मॉक एक्सरसाईज (अभ्यास) करे जाही। एमा ए बात ऊपर जोर दे जाही कि अइसन मुसीबत के बखत कइसन ढंग ले सुरक्षा अउ इंतज़ाम करे जाय।

ए बैठक मा आपदा के बखत आपातकालीन तैयारी, आग बुझाय के तैयारी, मनखे मन ला जागरूक करना अउ आपदा ले निपटे के तौर-तरीका मन के बारे मा जानकारी दिय गिस। ए वीडियो कॉन्फ्रेंसिंग मा गृह मंत्रालय भारत सरकार, राज सरकार के राजस्व अउ आपदा प्रबंधन, NDRF, SDRF, पुलिस बल के अधिकारी संग-संग उद्योग, परिवहन, स्वास्थ्य, गृह बिभाग अउ सब्बो जिला के जिला आपदा प्राधिकरण के अधिकारी मन सामिल होइन।