देश म सरलघा बाढ़त हे कोरोना संक्रमित मरीज मन के संख्या, कुल एक्टिव मामले होइस 90 हजार

जय जोहार…. भारत म लॉकडाउन-4 के पिछिले 12 दिन म कोरोना ह तेजी ले बाढ़त हे। ए दौरान कोरोना के करीब 70 हजार नवा मामले ह सामने आय हे। जबकि 1700 लोगन मन के जान चले गे हे। स्वास्थ्य मंत्रालय के तरफ ले जारी रिपोर्ट के अनुसार अब देश कोरोना संक्रमित मरीज मन के संख्या ह 1 लाख 65 हजार 799 हो गे हे। कोरोना ले अब तक 4706 लोगन मन के मौत हो गे हे। ऊहचे राहत के बात हे कि स्वस्थ होवइया के संख्या ह जियादा हे। देश म अब कुल सक्रिय मामले के संख्या ह लगभग 90 हजार हे।

बता देन कि भारत म लॉकडाउन-4 ल 18 मई के लागू करे गिस। वो दिन देश म कुल कोरोना संक्रमित मरीज मन के संख्या ह 96169 रहिस, जेमा ले 3029 लोगन मन के मौत हो गे रहिस। जबकि 36 हजार 823 लोगन मन ह स्वस्थ होके अपन घर लहुट चुके रहिस।