गांव के हजारों परिवार मन बर ए किसान बनिस मसीहा, घर-घर जा के अइसे करत हे जरूरतमंद मन के सहायता
जय जोहार धमतरी…. पूरा देश म 21 दिन के लॉक डाउन हे, लेकिन एखर बुरा असर ह मजदूर मन के रोजी रोटी म पड़े हे। जेन मन ह रोज कमा के अपन परिवार के भरण पोषण करत रहिस। कोरोना ह आज एखर रोजी रोटी म लॉक लगा दे हे। अइसे म मजदूर परिवार ल कोनो तरह के दिक्कत न हो। एखर बर शासन अऊ कुछु सामाजिक संस्था ह गरीब अऊ मजदूर मन के सहयोग करत हे। ऊहचे भुरसीडोंगरी के रहवइया किसान अरुण साहू ह एखर बीड़ा उठाए हे।
किसान ह अपन साथी मन के संग मिल के गांव-गांव म सब्जी बांटत हे। जिला के वनांचल इलाका के भुरसीडोंगरी गांव म सब्जी के खेती करइया किसान मन ह लॉक डाउन के उपजे परिस्थिति के चलत अब घर-घर सब्जी पहुंचाए के बीड़ा उठाए हे। रोजाना जरूरतमंद लोग मन ल सब्जी के वितरण करत हे अऊ कोनो घलो तरह ले शुल्क नई ले जात हे। गौरतलब हे कि भुरसीडोंगरी म 500 परिवार निवास करत हे अऊ एमा 80 प्रतिशत लोग ह मजदूरी कर जीवन यापन करत हे। अब गांव के अलावा किसान ह दूसर गांव म घलो सब्जी बांटत हे।
