ए भाजपा नेता के प्रयास ले गांव मन म होइस सोडियम हाइपोक्लोराइट के छिड़काव

जय जोहार कोरिया…. कोरोना ले बचाव बर जिला के भाजपा युवा नेता अंचल ह एसईसीएल बैकुंठपुर प्रबंधन के तरफ ले चरचा कॉलरी ले सटे ग्राम मन म कीटनाशक सोडियम हाइपोक्लोराइट के छिड़काव करिस। दु-तीन दिन पहिली भाजपा के युवा नेता अंचल किशोर राजवाड़े ह महाप्रबंधक अऊ रेस्क्यू इंचार्ज ले बात करे रहिस, जेमा वो हा चरचा कॉलरी के आसपास के ग्राम सरडी, शिवपुर, फूलपुर, जूनापारा, उमझर, नगर, आमगांव, खरवत आदि म कोरोना वायरस के संक्रमण ल रोके के उद्देश्य ले सोडियम हाइपोक्लोराइट दवा छिड़काव करे बर आग्रह करे रहिस।

जेमा म प्रबंधन ह ग्राम बिशुनपुर के स्कूलपारा मोहल्ला, नगर के बस्ती, ग्राम पंचायत भवन, प्राथमिक स्वास्थ्य केंद्र भवन, उमझर के बस्ती, पंचायत भवन, आयुर्वेदिक अस्पताल भवन म कीटनाशक दवा के छिड़काव करिस।