corona : ए जिला म मिलिस पहला संक्रमित मरीज, छत्तीसगढ़ म एक्टिव मरीज मन के संख्या होइस 116

जय जोहार…. छत्तीसगढ़ म कोरोना (corona) संक्रमित मरीज मन के संख्या ह सरलघा बाढ़त जात हे। प्रदेश म गुरुवार के एक अऊ कोरोना पाजिटिव मरीज मिले के पुष्टि होय हे। बस्तर संभाग के कांकेर जिला म कोरोना ह दस्तक दे दे हे। दुर्गकोंदल विकासखंड के कलंगपुरी ग्राम म एक युवक ह कोरोना संक्रमित पाय गे हे। एखर पुष्टि जिला कलेक्टर केएल चौहान ह करे हे। अब प्रदेश म कुल कोराना (corona) संक्रमित मरीज मन के संख्या ह बाढ़ के 116 हो गे हे।

जानकारी के मुताबिक कोरोना (corona) संक्रमित युवक ह 14 मई के मुम्बई ले कांकेर लहुटे रहिस। जेखर बाद ओला कलंगपुरी के पूजारीपारा क्वारेंटाइन सेंटर म रखे गे रहिस। युवक ह रैपिड टेस्ट म पाजिटिव आय के बाद ओखर सैम्पल लेके आरटीपीसीआर बर जगदलपुर डिमरापाल मेडिकल कालेज भेजे गे रहिस। जिहां ले आज ओखर जांच रिपोर्ट ह पाजिटिव आय हे।

बता देन कि बुधवार के एक दिन म ही 14 नवा मरीज मिले रहिस। जेमा बिलासपुर म देर रात पांच नवा मरीज मिले रहिस। ऊहचे रायगढ़ म तीन, बालोद म 2, बलौदाबाजार म 2, राजनांदगांव म एक अऊ सरगुजा म एक नवा मरीज मिले रहिस।