राजधानी म फेर मिलिस कोरोना के तीन नवा मरीज, सक्रिय केस ह बाढ़ के होइस 12

जय जोहार…. राजधानी रायपुर म घलो कोरोना संक्रमित मरीज मन के संख्या ह बाढ़त हे। गुरुवार के रायपुर म कोरोना संक्रमित तीन नवा मरीज के पहचान होय हे। राजधानी रायपुर म अब 12 एक्टिव केस हो गे हे।

जिला प्रशासन ले मिले आकड़ो के मुताबिक एक मरीज ह रामसागरपारा के रहवइया हे। ऊहचे देवपुरी म एक नाबालिग ह कोरोना पाजिटिव मिले हे। जबकि उरला के एक कंपनी म कार्यरत श्रमिक ह कोरोना संक्रमित पाय गे हे। अभी तक जानकारी के मुताबिक आज संक्रमित मिले सब्बो मरीज के कोनो ट्रेवल हिस्ट्री नई हे।

बता देन कि रायपुर म कोरोना के अब तक कुल 21 संक्रमित मरीज सामने आये हे। जेमा ले 12 सक्रिय मरीज हे। ए वायरस ले 8 लोगन मन ह स्वस्थ हो अपन घर लहुट चुके हे। ऊहचे एक मरीज के मौत हो गे हे। कोरोना वायरस के सबले पहला केस ह राजधानी रायपुर म ही मिले रहिस।