सूरजपुर म मिले 10 कोरोना संदिग्ध मरीज मन म ले तीन के रिपोर्ट ह आइस पाजिटिव, छत्तीसगढ़ म अब पांच एक्टिव केस

जय जोहार…. छत्तीसगढ़ के सूरजपुर जिला म मिले 10 कोरोना संदिग्ध मन म ले 9 के रिपोर्ट सामने आय हे। जेमा ले तीन लोग मन ल कोरोना पॉजिटिव पाय गे हे। जबकि 6 के रिपोर्ट निगेटिव आय हे। ऊहचे एक के रिपोर्ट अभी आना बाकी हे। अब प्रदेश म फेर ले एक्टिव मरीज मन के संख्या ह पांच हो गे हे। एखर पुष्टि रायपुर एम्स ह करे हे।

रायपुर एम्स अस्पताल ह मेडिकल बुलेटिन ट्वीट करत हुए बताइस कि सूरजपुर के 10 सैंपल ल कंफर्मेटरी टेस्ट करे गिस। एमा ले तीन पाजिटिव पाय गे हे। 6 निगेटिव मरीज मन ल क्वारेंटाइन करे जात हे। जबकि एक मरीज के टेस्ट दोबारा करे के निर्णय ले गे हे।

बता देन कि आज बिहिनिया ही दु कोरोना मरीज मन ल ठीक होय के बाद डिस्चार्ज करे गे हे। अब तीन अऊ मरीज मिले ले कोरोना पाजिटिव के संख्या बढ़ के 5 हो गे हे। जेखर एम्स अस्पताल म इलाज जारी हे। प्रदेश म अब तक 41 कोरोना पाजिटिव मरीज मिले हे। जेमा ले 36 मरीज ह स्वस्थ होके घर लहुट चुके हे।