बिलासपुर । कोटा म कांग्रेस ह तहसील घेराव कारयक्रम ह बिना स्थानीय विधायक रेणु जोगी के होइस हे। जिहां एक बार फेर रेणु जोगी ह कांग्रेस संगठन के कारयक्रम ले अपन विधानसभा म दूरी बनाय रखीस। कोटा म सोमवार के नेता प्रतिपक्छ टीएस सिंहदेव के अगुवाई म पीसीसी के निरदेशानुसार आमसभा अउ तहसील कारयलय के घेराव सूखा राहत अउ फसल बीमा के मुआवजा ल लेकर करे गिस।
कारयक्रम म टीएस सिंहदेव के संग बिलासपुर जिला कांग्रेस के पदाधिकारी त सामिल होइन, पर कोटा विधायक रेणु जोगी ह सामिल नइ होइस । येखर पाछु रेणु जोगी ह तरक दिस के उमन ल संगठन डहर ले जानकारी नइ देय गिस, जेखर समरथन करत हुये टीएस सिंहदेव ह कहिन के ये दफा हमर ले चूक होइस हे अउ उमन ल सही तरीका ले संगठन के ओर ले जानकारी नइ देय गिस।
सिंहदेव ह मीडिया ले बात करत हुए रेणु जोगी के खेलाफ त कोनो बात नइ बोलिस अलबत्ता उमन ह रेणु जोगी के पक्ष लेवत हुए कहिन के उमन ह कांग्रेस के प्रति निष्ठा जाहिर करे हे। अउ कहे के कांग्रेस ह उंखर अउ उमन के परिवार बर बहुत कुछु करिस हे । अउ उमन ह अब तक ले कांग्रेस नइ छोड़े हे। सिंहदेव ह कहिन के कांग्रेस ह उमन ल बहुत अवसर देय हे अउ पांच बछर बर उमन ह कांग्रेस विधायक के रूप म जवाबदारी लेय हे ओला निभाइस हे अउ पति अउ बेटा के पार्टी के कारयक्रम म आज तक उंखर फोटो तक नइ देखे बर मिलीस।
नेता प्रतिपक्ष ह जोगी के पार्टी के चुनाव चिन्ह आवंटित होय म निसाना साधत हुये कहिन के वो ह हल लेके जावत हे । हमन बइलगाड़ी म जावत हन। जोगी सबला संग लेके नइ चस सकय। येखरे सेती छत्तीसगढ़ म कांग्रेस हारिस हे अउ अब उनके हालत ये होगे हे के वो ह सिरिफ हमन ल नुकसान पहुंचाना चाहत हे। वो येखरे सेती रमनसिंह ल संग देवत हेअउ रमन सिंह घलो जोगी के काफी मदद करत हे। ये आम मतदाता जान चुके हे।
