खेल अउ खिलाड़ी मन ल आघू बढ़ाए बर टूर्नामेंट जरूरी: अरुण साव

उप मुख्यमंत्री गोंडवाना कप ऑल इंडिया टेनिस टूर्नामेंट के समापन कार्यक्रम म सामिल होइन

रायपुर, उप मुख्यमंत्री अउ खेल एवं युवा कल्याण मंत्री अरुण साव ह आज रायपुर के जोरा म स्थित इंटरनेशनल टेनिस स्टेडियम म आयोजित गोंडवाना कप ऑल इंडिया टेनिस टूर्नामेंट-2026 के समापन कार्यक्रम म सामिल होइन। ओमन मिश्रित अउ एकल के विजेता खिलाड़ी मन ल इनाम प्रदान करिन।

उप मुख्यमंत्री श्री साव ह खिलाड़ी मन ल संबोधित करत हुए कहिन कि छत्तीसगढ़ म गोंडवाना कप के आयोजन कतको साल ले होवत हे। परदेस म लगातार खेल प्रतियोगिता होय ले खिलाड़ी मन ल बढ़िया मउका मिलथे अउ सुघर खिलाड़ी निकल के आथें। टूर्नामेंट म 20 राज्य के 120 खिलाड़ी मन के भाग लेना ही एकर सफलता ल बताथे।

श्री साव ह कहिन कि खेल अउ खिलाड़ी मन ल आघू बढ़ाए बर टूर्नामेंट ह बहुते जरूरी हे। एकर बिना खेल अउ खिलाड़ी दूनों आघू नइ बढ़ सकें। गोंडवाना कप जइसन प्रतियोगिता लगातार होना चाही।

ए विजेता खिलाड़ी मन ल मिलीस ट्रॉफी

महिला डबल्स के फाइनल मुकाबला म शताक्षी चौधरी अउ अनन्या जैन (उत्तर प्रदेश) के जोड़ी ह स्निग्धा पाटिबंडला अउ इरम जैदी ल 3-6, 6-3, 10-7 ले हरा के खिताब अपन नाम करिन। उहें पुरुष डबल्स म निरव शेट्टी अउ अनुप बंगार्गी (महाराष्ट्र) के जोड़ी ह प्रसाद इंगाले अउ परितोष पवार ल 6-2, 6-4 ले हराइन।

उहें महिला एकल (Single) म राजस्थान के आयुषी तनवार ह उत्तरप्रदेश के शताक्षी चौधरी ल 2-6, 6-2, 6-2 ले हरा के खिताब जीतिस।

पुरुष एकल (Single) म तेलंगाना के नैशिक रेड्डी गनागामा ह महाराष्ट्र के प्रसाद इंगाले ल 7-6 (7-4), 6-3 ले हरा के विजेता बनिस। उप मुख्यमंत्री श्री साव ह जम्मो विजेता खिलाड़ी मन ल ट्रॉफी प्रदान करिन। समापन कार्यक्रम म एआईटीए (AITA) के महासचिव अनिल धुपर, स्टेट टेनिस एसोसिएशन के अध्यक्ष अउ हरिभूमि के प्रधान संपादक डॉ. हिमांशु द्विवेदी, गुरुचरण सिंह होरा, उपाध्यक्ष नरेश गुप्ता अउ आशीष सराफ के संग भारी संख्या म खिलाड़ी अउ खेलप्रेमी मन उपस्थित रहिन।

24 ले 26 अप्रैल तक खेल मंत्री मन के चिंतन सिविर

श्री साव ह बताइन कि 24 अप्रैल ले 26 अप्रैल तक श्रीनगर म चिंतन सिविर के आयोजन होवत हे। एमा जम्मो राज मन के खेल मंत्री अउ भारत सरकार के मंत्री अउ अधिकारी मन सामिल होही। ओमन बताइन कि 2047 म जब देस ह आजादी के 100 साल पूरा करही, त देस ह बिकसित बने, अउ एकर संग-संग खेल के दुनिया म घलो भारत ह सबले आघू राज बने—ए लच्छ (लक्ष्य) ल पाय बर प्रधानमंत्री नरेंद्र मोदी के मार्गदर्शन म योजना बना के काम होवत हे। पक्का रूप ले ए चिंतन सिविर ले बड़े लाभ होही।