जय जोहार…. मजदूर मन के घर वापसी बर ट्रेन के तिथि के घोसना ल रेल मंत्रालय के तरफ ले जल्द करे के मांग प्रदेश कांग्रेस संचार विभाग के अध्यक्ष शैलेश नितिन त्रिवेदी ह करे हे। छत्तीसगढ़ सरकार ह त छत्तीसगढ़ ले बाहर के प्रदेश म फंसे राज्य के मजदूर मन के घर वापसी बर अपन ओर ले किराया जमा करे के सहमति पत्र रेलवे ल घलो दे दे हे।
कांग्रेस संचार विभाग के अध्यक्ष शैलेश नितिन त्रिवेदी ह कहिन कि केंद्र सरकार ह मजदूर मन के अपन-अपन घर, गांव अपन प्रदेश वापसी बर विशेष ट्रेन चलाये के घोसना त कर दिस, लेकिन अभी तक छत्तीसगढ़ के मजदूर मन बर देशभर ले चलइया स्पेशल ट्रेन के तिथि के जानकारी ल केंद्र सरकार या रेलवे के तरफ ले नई दे गे हे। जबकि छत्तीसगढ़ सरकार ह देश के पहली सरकार हे, जेन ह रेलवे ल पत्र लिख के ट्रेन के आवश्यकता अऊ संख्या ल बता दे हे अऊ अपन तरफ ले किराया दे के पेशकश घलो कर दे रहिस।
कांग्रेस पार्टी ह घलो केहे हे कि देशभर म मजदूर मन ल ओखर घर-गांव लहुटने बर रेलवे के तरफ ले जेन स्पेशल ट्रेन चलाये जाही, ओखर किराया ल कांग्रेस पार्टी ह वहन करही।
