तरिया म डूब के दू झन लईका के मउत, गांव म मातम

कवर्धा। कुकदूर थाना इलाका के झिंगरा डोंगरी गांव म तरिया म डूबे ले दू झन लइका के मउत हो गे। ये घटना ले गांव म मातम हे। पुलिस ह घटनास्थल म पहुंच के जांच म जुटिन हे।

जानकारी के मुताबिक झिंगरा डोंगरी गांव म इतवार के बिहनिया लगभग 9 बजे लक्ष्मी पिता कार्तिक अउ उमेश्वरी पिता डिकेश साहू ह अपन दू झन सहेली के संग तरिया म नहाए बर गे रिहिन। नाहवत-नाहवत एक बच्ची ह गहरा पानी म चल दिस, ताहन ओला डूबत देख के दूसर बच्ची ह ओला बचाए बर गिस त उहू ह पानी म डूब गे। दूनों लईका ल डूबत देख के उंखर संग नहाए बर गे रिहिन अउ दू झन लईका मन बचाए बर चिल्लईस हे। लईका मन के आवाज ल सुन के कुछ गांव वाले मन पहुंचिस। जब तक दूनों लईका ल तरिया ले बाहर निकालतिस तब तक उंखर मन के मउत हो गे रहीस।