Dhamtari म फेर कोरोना के 2 नवा मरीज के होइस पहचान
जय जोहार…. धमतरी (Dhamtari) जिला म कोरोना संक्रमित मरीज मन के संख्या ह सरलघा बाढ़त जावत हे। रविवार देर रात के जिला म कोरोना के दू नवा संक्रमित मरीज मन के पहचान होय हे।
एमा ले एक युवक ह किर्गिस्तान ले लहुटे रिहिस। ऊहचे महिला ह संतलहरी नगर क्षेत्र के रहवइया हे। जानकारी के मुताबिक एक युवक ह किर्गिस्तान ले लहुटे हे, जेन ह शहर के बठेनापारा वार्ड के रहवइया हे।
धमतरी (Dhamtari) आय के बाद ओला रुद्री रोड साहू सदन के पेड क्वारेंटाइन सेन्टर म रखे गे रिहिस।
युवक के रिपोर्ट ह पाजिटिव आय के बाद स्वास्थ्य विभाग के टीम ह साहू सदन पहुंच गे हे। ओला कोविड अस्पताल धमतरी (Dhamtari) म शिफ्ट करे के तैयारी हे।
उहचे एक महिला के रिपोर्ट घलो पाजिटिव आय हे। ओखर पति ह ठेकेदार हे, जेन कोरोना पाजिटिव होय के बाद पहिले ही एम्स म भर्ती हे।
प्रायमरी संपर्क म आय के बाद महिला के सैम्पल ले गे रिहिस अउ आन बीमारी घलो होय के सती महिला ल एम्स रेफर करे गे हे।
जिला सर्विलांस अधिकारी डॉ विजय फूलमाली ह बताइस कि दुनो मरीज मन के संपर्क हिस्ट्री निकाले गे हे। दुनो ह क्वारेंटाइन म रिहिस, एखर सती आन लोगन मन म संक्रमण फैले के आशंका नई हे।
