साढ़े छह लाख के अधिक के गांजा संग दो तस्कर गिरफ्तार, तस्करी बर नवा-नवा तरीका देख पुलिस हैरान

जय जोहार बरमकेला… गांजा तस्कर ह ये समय तस्करी के नवा-नवा तरकीब ल निकालत हे। एखर अइसने तरकीब ल देखके पुलिस हैरान हे। रायगढ़ जिला के सरिया पुलिस ह बड़े कार्रवाई करत हुए एक वाहन ले एक क्विंटल 35 किलोग्राम गांजा जब्त करिस। एखर कीमत ल 6 लाख 75 हजार रूपिया आंकी गिस हे।

सरिया पुलिस ह मुखबिर के सूचना म सनिच्चर दोपहर करीब दो बजे उड़ीसा के तरफ ले आवत टाटा सुपर एक्समिन्ट क्रमांक यूपी 50 बीटी 2329 वाहन ल घेराबंदी करके रोकिस, जिहां पुलिस ह वाहन के तलाशी लिस। एमा वाहन म सबले नीचे एक केबिन बनाए गे रहिस, जेमा एक क्विटंल 35 किलोग्राम गांजा मिलिस।

ओखर ऊपर कैरेट रखे रहिस हे। गांजा ल जब्त करके पुलिस ह आरोपी दीपक मौर्य अऊ रविप्रकाश ल गिरफ्तार कर लिस। दोनों आरोपी मन ह उत्तरप्रदेश के आजमगढ़ जिले के रहवइया हे। ओखर खिलाफ पुलिस एनडीपीसी के तहत कार्रवाई करत हे।